KHAWTHLIR

Chapchar Kût
Chapchar Kût Programme Sub-Committee chu nimin khan an chairman R Hmingthanzuala, Art & Culture director hoin an ṭhukhawm a, kumin Kût thupui atan 'Zo nun ze mawi - rinawmna' tih an thlang. Chapchar Kût hi March 4, 2022-ah visual programme leh live stream hmangin Vanapa Hall-ah hman a ni ang.

MLA-in hawng
Serlui bialtu MLA Lalrinsanga Ralte chuan nimin khan a MLA fund hmanga a bial chhung, Saihapui-V khuaa health clinic centre sak thar a hawng a, sorkarin ramri a ngaih pawimawhzia lantirna a nih thu a sawi. Lalrinsanga Ralte hian health clinic centre-a thawk tur health worker pawh a MLA fund hmangin a chhawr nghal a ni.

Kawng siam dawn
PWD chuan vawiin aṭangin Zarkawt kâwn leh Chief Minister Office inkar kawng siam hna an thawk dawn a, hna thawh chhungin kawng khâr a ni dawn. Zarkawt kâwn aṭanga Zarkawt Presbyterian biak-in lam kal turte chu Zarkawt tlang panna kawng pakhat zawk (Sangzuala Road)-ah kal tur a ni a, Zarkawt biak-in aṭangin Zarkawt kâwn lamah tlan thlak theih a nih dawn loh avangin Chanmari lamah kal tur a ni.

Dàwr theih loh
Mizoram Legislative Assembly session (budget session) vawi 9-na chu kumin February 22 aṭanga March 10 chhungin neih a ni dawn a, hei vang hian nimin aṭang khan Assembly Secretariat chu páwn lam mi tan dàwr phal a ni rih lo. Assembly session kaihhnawiha office dàwr ṭulna a awm chuan Under Secretary (GA) phone no. 9862361345/ 2322364-ah phalna lâk hmasak tur a ni.

Heroin no. 4 man
Excise & Narcotics department chuan nimin chhun dar 12:30 khan Champhai leh Zokhawthar inkara Sapianmaksak hmunah heroin no. 4 gram 290 (hawng 25) an man a, a neitua puh Vanliana (41) s/o Lenthanga, Tahan, Myanmar, tuna ráltlân avanga Zokhawthara khawsa mek nia inchhál an man bawk. Heroin kawltu lakah The Narcotic Drugs & Psychotropic Substances Act tlawhchhanin thubuai ziah luh a ni.