Defence Minister hoa Sainik BoG ṭhut khawmah Mizoram chief minister Zoramthanga a tel

Union Defence minister Rajnath Singh kaihhruaiin nimin khan internet kaltlangin Sainik Board of Governors an ṭhukhawm a, chief minister Zoramthanga a tel.

CM Zoramthanga chuan, Mizo zirlai tam takin Sainik School an chhawr ṭangkai tih sawiin, Sainik School chu lian zawka a ṭhan zel a duhsak thu a sawi a; National Defence Academy leh Naval Academy-a luh tumte buatsaihna ṭha tak Mizoramin a nei chu lawmawm a tih thu a sawi bawk.

Ṭhutkhawmah hian Sainik School din belh leh sikul dinna tur ram neih belh chungchang te, Board of Governors member tihpun leh thu pawimawh dangte an sawiho a ni. An rorel hrang hrang chu state tinte'n an ngaihdan leh sawi belh duh an neih chuan sorkar laipuiah ni 10 ral hmaa ziaka thlen turin an ti a ni.

Mizoramah chuan Chhingchhipah Sainik School a awm a, April 21, 2017 khan din niin, National Defence Academy leh Naval Academy-a mipa naupangte an luh theih nan hma an la ṭhin. Kum 2018-19 academic year atan hmeichhe zirlai lak ṭan a ni a, India rama Sainik School zinga hmeichhiate luh theihna hmasa ber a ni.

Sainik School inrêlbawlna enkawltu chu Defence Minister kaihhruai Board of Governors a ni a, BoG-ah hian Chief Minister leh Education Minister-te an tel. Nimina ṭhutkhawmah hian School Education minister Lalchhandama Ralte pawh a tel a ni.