Ruihhlo laka naupangte himna tura Ruahmanna bawhzui dan tur sawiho

Mizoram State Commission for Protection of Child Rights (MSCPCR) buatsaihin, nimin khan Secretariat conference hall-ah ruihhlo laka naupangte himna tura sorkar kutke hrang hrangte’n ṭangruala hma an lakna tur ruahmanna bawhzui dan sawiho a ni.

Sawihonaah hian MSCPCR chairman Dr C Lalsangzuala chuan, Mizoramah ruihhlo vanga buai naupang an pun zel avang leh Mizo hnam tana pawi lian tak la thlen thei tur a nih avangin ruihhlo do kawngah ṭan rual a ngaih thu a sawi a, “Ruihhlo donaa kil hrang hranga thawktute’n mahni hmazawn ṭheuha hma an laknate chu hlawm khata luan khawmtir a nih chuan rah ṭha zawk a nei theiin, hnawh phui ngai laite chiang zawkin a lang thei dawn a ni,” a ti.

National Child Rigths Commission leh Narcotic Control Bureau chuan kaihhnawih ministry dangte nen thawkho a, ruihhlo laka naupangte himna tura hmalak dan tur ruahmanna kimchang an duan Joint Action Plan-ah India rama district 272 thlan chhuah a ni a, chu’ng zingah chuan Mizorama district pathum - Kolasib, Aizawl leh Champhai a tel.

District pathuma DC, Police, Excise and Narcotics, Health leh Education department-te bakah, naupang enkawl leh dâwm kânna kawnga thawktu sorkar kutkete chu JAP hnuaiah an thawkho mek a ni.