February ni 9 chhungin hripui vei 16,704 hmu

February 9, Nilaini khan Mizoramah Covid-19 vei mi 1,811 hmuh chhuah a ni a, February thla ni 9 chhungin mi 16,704 hmuh a ni. Nimin khan hripui vei dam tawh mi 1,977 chhuahtir an ni a, Covid-19 vei mi pali an thi.

Covid-19 vei Nilainia hmuh tharte chu mipa 796 leh hmeichhia 1,015 an ni a; RT-PCR laboratory pahniha hmuh chhuah 408, TrueNAT hmanga hmuh 104, RAT hmanga hmuh 1,286 leh FIA hmanga hmuh 13 an ni. Positivity rate chu 24.74% a tling.

Mizorama sample endikna district 10-te chu positivity rate 10% chung lam vek a ni a, district pariatah 20% chung lam niin, district pathumah 30% chung lam a ni. Siaha district-ah swab sample endik a ni lo.

Covid-19 positive mi 30 aia tam hmuhna khua leh veng a awm nual a, Zemabawk (mi 44) leh Hunthar Veng (mi 32) tih loh chu Aizawl pawn lam vek a ni. Lunglei Theiriatah mi 61 hmuh niin, an zinga mi 29 chu TNT-a awmte an ni a, Phaileng South, Lunglei district-a mi 60 hmuh a ni bawk.

Nimin tlai dar 5 thleng khan hripui vei dam tawh mi 1,977 chhuahtir an ni a; district tina chhuak zat chu - Aizawlah mi 1,239, Mamitah 196, Lungleiah 185, Champhaiah 95, Serchhipah 65, Kolasib-ah 62, Khawzawlah 55, Saitualah 51, Lawngtlaiah 18, Siahaah 14 leh Hnahthialah mi pasarih an ni.

IDSP record angin, Mizoramah Covid-19 vei 1,91,726 hmuh chhuah a ni tawh a, mipa 90,180 leh hmeichhia 1,01,546 an ni a, mipa aiin hmeichhia 11,366-in an tam zawk. Nimin tlai dar 5 thleng khan mi 1,80,048 (93.91%) chhuahtir an ni tawh a, mi 633 (0.33%) thi tawhin, enkawl mek mi 11,045 (5.76%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 1,91,726 chu mi 1,000 zelah hripui vei mi 174 an awm ang a ni a; mi 1,00,000 zela Covid-19 vangin mi 57 an thi tawh ang a ni tih sorkar thuchhuakin a tarlang.

Mizoramah February 8, 2022 thlenga swab sample endik tawh 17,37,334 aṭanga RT-PCR hmanga endik zat percentage chu 20.65 a ni a, RAT hmanga endik zat chu 73.66% a tling.