Covid-19 vangin mi 633 thi tawh

Nimin khan tlai dar 5 thlengin Mizoramah Covid-19 vangin mi pali an thi a, February 9, Thawhlehnia thi pakhat tarlan a awm bawk. Mizoramah hripui vangin mi 633 an thi tawh a, kumin February thla bikah mi 23 an thi tawh.

February 9, Nilaini tlai dar 4:05 khan Laisiama (92), Bethlehem Vengthlang chu State Refferal Hospital-ah hripui vangin a thi a, Covid-19 positive a ni tih February 8, 2022 khan hmuh chhuah niin, SRH-ah enkawl nghal a ni.

Nilaini zanlai pelh hnu, zan dar 12:45 (February 10) khan Savitri Jaishi (63), Zotlang, Aizawl chu SRH-ah a thi a, natna dang nei tel a ni. Covid-19 vei a ni tih February 6 khan finfiah a ni. John Lalruatkima (2), Hunthar Veng chu nimin zing dar 2:50 SRH-ah thi a, Covid-19 pisitive a ni tih February 9 khan hmuh chhuah niin, SRH-ah enkawl nghal a ni.

Esra Malsawmsanga (1), Thenzawl Bazar Veng pawh nimin tlai dar 4:55 khan hripui vangin Serchhip DCHC-ah a thi a, COvid-19 vei a ni tih February 9, 2022 khan hmuh chhuah a ni. Nimin tlai dar 5 khan Bhim Bahadur Chhetri (65), Kolasib Tuiṭha Veng pawh SRH-ah a thi a, hripui a vei tih January 30 khan hmuh niin, natna dang nei tel a ni.