Abu Mazumdar-a tribal certificate lem nia sawi thehdarh vangin FIR thehlut

Abu Mazumdar Sailo s/o Zoram Chhetri Sailo, Zuangtui, Aizawl tribal certificate lem nia sawi thehdarh chungchangah police-ah FIR thehluh a ni.

Aizawl bawrhsap Dr Lalhriatzuali Ralte chuan, Aizawl DC pisain Abu Mazumdar Sailo hnenah common service centre (CSC) kaltlangin scheduled tribe certificate a pek (issue) loh thu a tarlang.

Aizawl DC chuan, Abu Mazumdar Sailo hnena ST certificate pek nia lang thlalak chu February 9, Nilaini khan social media-ah a darh tih tarlangin, "Social media-a Aizawl DC pisain Abu Mazumdar Sailo s/o Zoram Chhetri Sailo, Zuangtui, Aizawla cheng hnenah CSC kaltlanga scheduled tribe certificate a pe anga lang chu Aizawl DC pisa aṭanga pek a ni lo a, a issue-tu hming inziak Lalzorama Chhakchhuak, Sub-Deputy Commissioner hi Aizawl DC pisaah a awm lo. He certificate (Dt.8.1.2022, Regn no. CCC15030076666) hi a lem a ni," a ti.

Bawrhsap chuan, Aizawl DC pisa pek anga lang document lem thehdarh a ni chu pawi a tih thu leh, dan loa thil titute zawn chhuah a nih theih nan Cyber Crime Police Station, Aizawlah first information report (FIR) thehluh nghal a nih thu a tarlang bawk.

Abu Mazumdar Sailo schedule tribe document anga lang thlalak theh­darha a lan danin, docu­ment chu January 8, 2022-a tihchhuah a ni a, lehkhaa hming ziaktu chu Lalzorama Chhakchhuak, SDC, Aizawl district a ni.

Abu Mazumdar Sailo schedule tribe document anga lang siam leh tihdarh chungchangah hian Lalvenhima, sub-divisional magistrate, Aizawl district chuan February 9 khan Cyber Crime Police Station-ah FIR a thehlut a ni.