Congress-in MLA candidate tur an puang ; Lal Thanhawla Serchhip leh Champhaiah

Mizoram Pradesh Congress Committee (MPCC) chuan nimin khan Lal Thanhawla Auditorium-ah November 28, 2018-a Mizoram Assembly inthlan awm tura an candidate turte an puang. Candidate turte hi constituency 36-a ding turte an ni a, bial palia an candidate tur an la puang lo. An party president Lal Thanhawla chu bial pahnih - Serchhip leh Champhai South-ah a ding dawn.

Candidate puanna inkhawm hi MPCC general secretary C Chawngkunga'n a kaihruaia; Lal Thanhawla chuan, an party mi kalkhawmte chu Congress-a an awm avanga miin malsawmna an dawn nasatzia hriaa lawm tura a chah a, "Kan party chuan kan ram politics boruak ang zelin policy kan siam a ni. Vote hmuhna atan leh sorkar tumna chauha policy hi siam tur a ni lo," a ti.

Lal Thanhawla chuan, Congress party an sorkar zel a ngai nia sawiin, "Hmachhawp tam tak kan nei a ni. Kan hmachhawpte hi keini lo chuan an tihlawhtling lo ang a, a ngaihna an hre ve lo," a ti a; an hmachhawpte tihhlawhtlin a nih theihna atan tu pawh an biala ding se, an hmachhawpte tihhlawhtlin a nih theihna atan vote turin an party mite a chah.

MPCC-in nimina candidate an puanaah hian Chakma Autonomous District Council (CADC) leh Mara Autonomous District Council (MADC) chhunga constituency pahnih ve vea an candidate tur an la puang ve lo. Hemi chungchangah hian MPCC President chuan, ADC-te chu autonomous an nih angin, an candi­date tur an duh záwng an thlang ṭhin tih sawiin, "A candidate tur an la rawn thehlut lo," a ti.

Candidate an la puan lohna bialte chu - Tuichawng, West Tuipui, Siaha leh Palak-te a ni a; Siaha tih loh zawngah hian Congress party-in MLA an nei mek a ni.

Hetih lai hian, Tuichawng constituency huam chhunga Congress-in candidate atana an ruat leh MLA ni lai Dr Buddha Dhan Chakma chuan October 10, Nilaini khan candidate aṭanga phatna MPCC President hnenah a thawn.

Congress party candidate turte an puan chin mi 36 zingah Congress MLA ni lai pakua chu candidate an ni dawn lo a; chungte chu - Hachhek bialtu Lalrinmawia Ralte, Aizawl North-II bialtu R Romawia (minister), Champhai South bialtu JH Roṭhuama, Kolasib bialtu PC Zoram Sangliana, Tuirial bialtu Hmingdailova Khiangte, Aizawl East-I bialtu R Lalrinawma (Assemly deputy speaker) leh Serlui bialtu K Lalrinthanga te an ni. Hetih lai hian, Chalfilh bialtu MLA Dr Ngurdingliana chu a bial ngaiah ding loin Kolasib bialah a ding ang.

Congress party-in an MLA candidate turte an puanna inkhawma fuihna thu sawitu Lal Thanhawla chuan, Brig. T Sailo policy ṭhin, Six Basic Beeds tih chu a ṭhing tawh niin a sawi a, "Tunah hian a aia ṭha hlir in vote chhuak a ni," a ti a; amah chu inthlanah vawi kua candidate a nih tawhah vawi khatmah a duhna bialah a la ding lo niin a sawi.

MPCC President chuan, Mizoram inthlan puan níah motor pathumin MNF mi leh sate'n NLUP office an pan nghal thu sawiin, "Office chhunga thla an la kual vel a, an thil tih hi miretheite hmangaihna a ni ang em?" a ti a; NLUP chu Prime Minister hnena hêk hneh loh vanga High Court-a hêk leh chu miretheite lam ṭang a nih ang em, tiin zawhna a siam bawk.

Lal Thanhawla chuan, district chu politics khelhna atan hman chi a nih loh thu a sawi a, "District hi thei sema sem chi a ni lo, campaign na atan pawh hman tur a ni lo; ngun taka ngaihtuah tur a ni. Mipui leh ram hmangaihtute tan chuan district hi politics khelhna atana hman tur a ni lo," a ti a; kum 2008-ah MNF sorkarin district pathum an puang chung leh sikul tam tak an upgrade a, IR battalion an din nual chung pawhin an tlak chian ber ṭum a nih thu a sawi.

MPCC President chuan, politics chu Pathian nung rawngbawlna a ni tih sawiin, "Politics hian kan thlarau nun thlengin a nghawng a ni a, Pathianin 'Nang malsawmna ni ang che,' a tih hi kan zavaia tan a ni," a ti. Candidate tur an siam chungchangah Pathian ráwn chunga an ngaihtuah thu a sawi a, "Candidate-te kan bial ṭheuhah kan duh zawng ni emaw, ni lo emaw, kan lo vote-in kan lo pui tur a ni. Tu pawh rawn dah se, kan party mi an nih chuan an ṭha vek, kan party mi ni lo chu an ṭha lo vek," a ti.

Lal Thanhawla chuan, mi ṭhenkhatin Mizoram kawng a ṭhat loh thu sawi an ṭhin chungchangah, "Silchar pawh la thleng lote hian kawng chhiat thu an sawi ringawt zel a, ram dang mi lo kalte hian 'In kawng a va ṭha ve' an ti zel a ni. Kan kawng a ṭha tih nemnghehna atan chuan India rama state tê zingah Mizoram hi kawng hrang hranga tehnaah a sang ber kan ni," a ti bawk.

Congress party candidate-te
Congress party candidate-te
Bial Hming Veng/Khua
Hachhek Lalrindika Ralte Zarkawt, Aizawl
Dampa Lalrobiaka Dinthar, Aizawl
Mamit John Rotluangliana Dawrpui, Aizawl
Kolasib Dr Ngurdingliana Chanmari, Aizawl
Serlui Lalhmachhuana Chawnpui, Aizawl
Tuivawl RL Pianmawia Darlawn
Chalfilh LT Hrangchal Tuivamit, Aizawl
Ṭawi Rosiamngheta Chanmari, Aizawl
Aizawl N-I C Lalhlimpuia Chaltlang, Aizawl
Aizawl N-II H Liansailova Bawngkawn
Chhimveng, Aizawl
Aizawl N-III Lal Thanzara Zarkawt, Aizawl
Aizawl E-I K Vanlalrawna Zemabawk, Aizawl
Aizawl E-II Lalsawta Mission Vengthlang,
Aizawl
Aizawl W-I PC Laltlansanga Kulikawn, Aizawl
Aizawl W-II Dr Lalmalsawma Kulikawn, Aizawl
Aizawl W-III Dr CT Tluanga Mission Vengthlang,
Aizawl
Aizawl S-I R Vanlalvena Bethlehem, Aizawl
Aizawl S-II Lt.Col. ZS Zuala Mission Veng, Aizawl
Aizawl S-III KS Thanga Luangmual, Aizawl
Lengteng H Rohluna Ramthar Veng, Aizawl
Tuichang James
Thanghmingmawia Upper Republic, Aizawl
Champhai N TT Zothansanga Champhai Vengthlang
Champhai S Lal Thanhawla Zarkawt, Aizawl
East Tuipui T Sangkunga Dinthar, Aizawl
Serchhip Lal Thanhawla Zarkawt, Aizawl
Tuikum Sangzela Tlau Vaivakawn, Aizawl
Hrangturzo Vanlalawmpuii Dawrpui Vengthar
Chawngthu Aizawl
South Tuipui John Siamkunga Thakthing, Aizawl
Lunglei N PC Lalthanliana Bazar Veng, Lunglei
Lunglei E Joseph Lalhimpuia Chanmari, Lunglei
Lunglei S Lalnunthara Chanmari, Lunglei
Lunglei W Chalrosanga Ralte Tuikual South, Aizawl
Thorang Zodintluanga Leitan, Aizawl
Lawngtlai W C Ngunlianchunga Bazar Veng, Lawngtlai
Lawngtlai E H Zothangliana Lawngtlai IV