MKHC-in inthlan thuchah a tichhuak
Mizoram Kohhran Hruaitute Committee (MKHC) chuan November 28, 2018-a Mizoram Legislative Assembly inthlan awm turah, sorkar ṭha leh chak din a nih theih nan Mizoram mipui hnena thuchah an siam a; an thuchah chu ngai pawimawha zâwm hrâm turin kohhran mipui leh political party-te an ngen.
MKHC chuan, Mizoram inthlanpui tluang taka neih a nih theih nan leh Pathian ṭih mi, roreltu ṭha thlan chhuah an nih theih nan November 3, Inrinni zanah Mizorama kohhran tinte chu ṭawngṭai turin an ngen a ni.
Thuchhuah siamtu MKHC-ah hian kohhran pawl 15 - Baptist Church of Mizoram, Congregational Church of India (Maraland), Evangelical Baptist Convention Church, Evangelical Church of Maraland, Evengelical Free Church of India, Independent Church of India, Lairam Isua Krista Baptist Kohhran, Methodist Church, Presbyterian Church of India, Roman Catholic, Salvation Army, Seventhday Adventist, UPC (NEI), Wesleyan Methodist leh Zomi Baptist Church-te an ni a; chairman Rev. F Lalrinnunga leh secretary Rev. R Lalrinsanga ten hming an ziak a ni.
MKHC thuchhuahin a tarlante
CANDIDATE RUAT CHUNGCHANG
Ram hruaitu ṭha kan neih theih nan candidate siamtu zawng zawngin hetiang mi ngei hi candidate atan thlang chhuak turin kan ngen a ni.
1. Mi hming tha leh rinawm, Pathian ṭih mi.
2. Ruih theih thila fihlim.
3. Hlêpna bawlhlawh leh thamna duh lo mi.
4. Mipat hmeichhiat kawnga hminghliau lo.
5. Mahni awmna sakhua, pawl leh kohhrana mi rinawm.
RAM MIPUI LEH PARTY TAN
1. Zalen tak leh duh thlanna dik hmanga mi tinin vote an thlak theih nan hel pawl leh ralthuam lam chi hman te, invau te, inbum te, sum sem te tih loh ni se.
2. Hnam bil zawng te, khawtlang inpumkhatna leh kohhran inunauna tichhe zawngtein eng pawl mahin hmalak loh ni se.
3. Mi mal leh pawl insawichhiat vak vak te, tharum thawhna chawk tho zawnga inelsèn leh inauh nawmnahte tih loh ni se.
4. Political party leh candidate-te'n ram pum huap tana ṭhat tlanpui loh tur zuara mipui hnena intiamkam chìn loh ni se.
5. Mipui pawhin ram pumin a ṭhatpui tur ni lem lo, veng/pawl/hnam bil, mi tlemte
ṭhat fâlna tur atan party leh candidate-te intiamtir tura nawr hauh loh ni se.
6. Therhlo leh sum ûma tumahin vote hralh loh ni se.
7. Kristian ram kan nih angin tu pawl mahin zawlnei der hmanruaa hman loh ni se.
8. Party inhawt buk nan leh inthlan campaign nan ruai theh loh ni se.
THLAN TLINTE CHUNGCHANG
1. Thlan tlin member apiang leh sorkar thar chu Mizoram kohhran hruaitute'n term puitling hmang zo ngei turin duhsakna kan hlan a. Anmahni thlangtu mipui leh roreltua ruattu Pathian zah chungin ram leh hnam tan hna thawk tur leh party aiawh chauh an ni tawh lo a, Mizoram mipui zawng zawng tana ding an nih hre reng turin kan duh. Kohhran leh pawl duhsak bik nei lo a, ang khata an thu leh hla ngaih pawimawhsak tur leh kohhrante thawhpui theiha an awm kan duh bawk.
2. Sorkar hmasain ram pum huapa ruahmanna a lo kal pui mek tawhte tipuitling tura hma la zui turin sorkar thar chu kan ngen.
3. Thlangtu mipui pawhin sorkar thar apiang chu kan ram tana Pathian min pekah pawmin, sawisel ringawt loin i ṭawiawm tlat ang u.
4. Thlan tlinte pawh thlangtute'n an thlan ang ngeia ding nghet a, zuang lawr mai mai lo turin kan ngen. Term khat pawh hmang tlingtla loa sorkar ding lai
ṭhiaha a awm ṭhin hi ram leh hnam mualphona a ni a, awm lo se kan duhin kan ṭawngṭai a ni.