Neutral-in MNF an zawm zel - Zoramthanga

MNF party chuan nimin khan Chalfilh constituency-a MNF cam­paign hawnna (kick-off) inkhawm Suangpuilawn community hall-ah an hmang a, campaign hawngtu MNF president Zoramthanga chuan neutral-in MNF an zawm zel thu a sawi.

Zoramthanga chuan, Mizoram siamṭhat duhtute party hrang hrang leh neutral aṭangin MNF-ah an lut mek zel nia sawiin, "Zoram ná tihdamna tura inthlan November thla khian a awm dawn a, Zoram mipuite Zoram dam nan MNF vote vek turin ka sawm a che u," a ti.

Congress party-in candidate an set fuh hlei thei lo nia sawiin Zorama chuan, "Candidate an han puang ang a, an buai dawn chauh niin a lang. Keini lamah erawh buaina a awm lo a, kan fel thluam thung," a ti a; Congress party chu an buai tak zet a, a tlaran chi hlirin an khawsa niin a sawi.

Zoramthanga chuan, "Mizoramah de­ve­lopment a chhuṭi a, kan state ṭhenawm zawng zawngte nuihzat dinhmunah kan ding ta hi a pawi tak zet," a ti a; "Assam Rifle ûm chhuak a, khawpui thar dintu leh hmasawnna tam tak thlentu hian Pathian leh mipui zarah kan hna kan thawh zawm leh dawn a ni," a ti bawk.

Chalfilh biala MNF candidate tur Lalrinliana Sailo pawhin thu sawiin, "Zoram dinhmun en hian, Pu R Lalzirliana nen hian MNF-ah hian kal lo mah ila, MNF hi an sorkar tho ka ring," a ti a; Mizoram dinhmun chu nauchhiatna ramah a chang mek nia sawiin, dinhmun ṭha zawkah hlankai a ṭul tak zet thu a sawi.

Lalrinliana Sailo chuan, Congress sorkarin inthlan tinzâwn hlirin sorkar sum kan hmang pawp pawp a, mipui hmasawn tak takna tur lam an ngaihtuah tâwk lo niin a sawi a, "Tun inthlan dawnah pawh hian mipuiin cheng nuai khat an dawn tur kha sing ngain kan ṭhensak a, minister pakhat phei chuan, 'Mipuite kan rûksak a ni maw,' a ti hial a ni," a ti. Chalfilh bial hmasawnna turin a theih ang anga thawh a châk thu a sawi bawk.