KHAWTHLIR
Joint platform
Mizoram People Forum (MPF) chuan zanin dar 8 hian Ignite Studio, Aizawlah political party-te tan MPF State Level Joint Platform an buatsaih dawn a, ZONET leh LPS-ah live-a tihchhuah a ni ang. He joint platform-ah hian political party tin aṭangin president/chairman emaw, party aiawh emaw an tel dawn a; Mizoram tana hna thawh an tum dante an sawi dawn a ni.
Career awareness
MZP general headquarters chuan nimin khan K.Higher Secondary School, Aizawlah Career Awareness Campaign an buatsaih. He hunah hian MZP President-in thu a sawi bakah, Zo-Career Solutions-a mi Lalhruaitluanga'n zirlaite hmalam hun atana pawimawhte a sawi a ni.
MITASA lawm
Mizoram Treasury Accounts Service Association (MITASA) chuan nimin khan Hotel Regency-ah inkhawmpui an hmang. Khawzawl, Hnahthial leh Saituala Treasury Office sorkarin hawn a tum chu lawmawm an tih thu an tarlang a, "Chutih rualin, Mizoram Treasury hi siamṭhat (restruct) a ngai a, hei hi remchangah sorkar hnenah thlen ni se," an ti.
Media Centre
Mizoram inthlanpui inbuataihna kal mekah, Chief Electoral Office pisa, Secretariat Annexe-I Building-ah ‘State Media Centre’ hawn a ni. Sorkar thuchhuah tarlan danin, Media centre hi media mite'n ṭangkai taka an hman theih tura thuam a ni dawn a, TV, telephone, computer, internet-te an chhawp dawn a ni.
MPCC thupuangtu
Mizoram Pradesh Congress Committee (MPCC) chuan an Media department chairman James Thanghmingmawia chu MLA candidate a nih tâk avangin, Lallianchhunga, Zotlang chu Media department chairman leh spokeperson atan an ruat. He mawhphurhna hi la nghal tura tih a ni.