Mizoramah World Sight Day hman a ni

Nimin October 11 kha mit ṭha lote leh mit chungchanga inzirtirna ni bik, 'World Sight Day' vawi 19-na a ni a; National Health Mission hnuaia National Programme for Control of Blindness & Visual Impairment (NPCBVI) chuan nimin khan Mizoram Upa Pawl (MUP)-te nen awareness campaign leh free clinic an huaihawt.

World Sight Day pual hian district hrang hrangah hun hman a ni a, Aizawlah chuan Civil Hospital (ACH) conference hall-ah hman niin, MUP president RK Thanga'n a hmanpui. Inkhawm hi NHM mission director Dr Lalrozama'n a kaihruai a, ACH medical superintendent Dr KL Remsanga'n inlawmna thu a sawi. NPCBVI state programme officer Dr Lalremmawii'n thupui 'Eye care everywhere' tih a sawi a ni.

RK Thanga chuan, fuihna thu sawiin, kum upa lam nih tawh hnuah pawh rilru paukhauh neih a pawimawh thu leh, a cháng chuan intihnaupan a ngaih thu a sawi a; upate chu hlâwk taka World Sight Day hmang turin duhsakna a hlan.

World Sight Day puala inkhawm zawhah a thlawna mit entrina buatsaih a ni a, tarmit mamawhte tan a thlawnin tarmit sem nghal a nih bakah, an mit mil awm lote pawh a thlawna chahsak nghal an ni dawn.

NPCBVI record-a a lan dan­in, April-August 2018 chhung khan NPCBVI hmalakna hnuai­ah cataract (mit naute pâw) zai tawh mi 1,084 an awm a; mit (cornea) laksak tawh mi 44 leh mit thlaksak tawh mi 17 an awm. Zirtirtu training pek tawh mi 484, sikul naupang mit endiksak tawh 27,478, sikul naupang mit ṭha lo hmuh chhuah 2,672, a thlawna tarmit pek mi 633 leh upa mit ṭha lo a thlawna tarmit pek mi 1,962 an awm tawh bawk.