ICFAI University-in convocation hmang

ICFAI University, Mizoram chuan nimin khan Durtlang North-a an campus-ah Convocation vawi-7na an hmang a, Governor Kummanam Rajasekharan khuallian a ni.

Governor chuan, ICFAI University zirlaite chu an hmabakah chona tam tak paltlang tur leh kawng thui tak zawh tur an la nei tih hre turin a chah a; "Zirna hi zalenna, thil tih theihna leh hmabak êng min siamsaktu, khawvel thlak danglamna atana hmanraw thil ti thei ber a ni. Khawvel inher danglam zelah zir tàwp ní a thleng thei lo a, khawvel hmasawnna ûmpha turin intuaithar reng a ngai," tiin, zirlaite chu mahni inrintâwkna nen rim tak leh taima taka thawk turin a fuih.

ICFAI University Mizoram vice chancellor, Lt.Gen. Dr AK Misra chuan, ICFAI University chu India rama state 16-ah a inzár pharh mek tih a sawi. Convocation-ah hian kumina under graduate leh post graduate zir chhuak mi 207 hnenah degree hlan a ni a, zirlai ti ṭha zualte hnenah medal hlan a ni bawk.

Aizawla ICFAI University-ah hian professional course leh information technology course leh Humanities & Social Sciences-ahte degree leh master degree zirna course 17 a awm a; run dinhmunah zirlai 700 chuang an awm mek a ni.