Congress-in MLA candidate tur an puang
Congress party-in an MLA candidate turte an puanna inkhawma fuihna thu sawitu Lal Thanhawla chuan, Brig. T Sailo policy ṭhin, Six Basic Beeds tih chu a ṭhing tawh niin a sawi a, "Tunah hian a aia ṭha hlir in vote chhuak a ni," a ti a; amah chu inthlanah vawi kua candidate a nih tawhah vawi khatmah a duhna bialah a la ding lo niin a sawi.
MPCC President chuan, Mizoram inthlan puan níah motor pathumin MNF mi leh sate'n NLUP office an pan nghal thu sawiin, "Office chhunga thla an la kual vel a, an thil tih hi miretheite hmangaihna a ni ang em?" a ti a; NLUP chu Prime Minister hnena hêk hneh loh vanga High Court-a hêk leh chu miretheite lam ṭang a nih ang em, tiin zawhna a siam bawk.
Lal Thanhawla chuan, district chu politics khelhna atan hman chi a nih loh thu a sawi a, "District hi thei sema sem chi a ni lo, campaign na atan pawh hman tur a ni lo; ngun taka ngaihtuah tur a ni. Mipui leh ram hmangaihtute tan chuan district hi politics khelhna atana hman tur a ni lo," a ti a; kum 2008-ah MNF sorkarin district pathum an puang chung leh sikul tam tak an upgrade a, IR battalion an din nual chung pawhin an tlak chian ber ṭum a nih thu a sawi.
MPCC President chuan, politics chu Pathian nung rawngbawlna a ni tih sawiin, "Politics hian kan thlarau nun thlengin a nghawng a ni a, Pathianin 'Nang malsawmna ni ang che,' a tih hi kan zavaia tan a ni," a ti. Candidate tur an siam chungchangah Pathian ráwn chunga an ngaihtuah thu a sawi a, "Candidate-te kan bial ṭheuhah kan duh zawng ni emaw, ni lo emaw, kan lo vote-in kan lo pui tur a ni. Tu pawh rawn dah se, kan party mi an nih chuan an ṭha vek, kan party mi ni lo chu an ṭha lo vek," a ti.
Lal Thanhawla chuan, mi ṭhenkhatin Mizoram kawng a ṭhat loh thu sawi an ṭhin chungchangah, "Silchar pawh la thleng lote hian kawng chhiat thu an sawi ringawt zel a, ram dang mi lo kalte hian 'In kawng a va ṭha ve' an ti zel a ni. Kan kawng a ṭha tih nemnghehna atan chuan India rama state tê zingah Mizoram hi kawng hrang hranga tehnaah a sang ber kan ni," a ti bawk.
Congress candidate bihchianna
1) Mi 36-te kum chawhrual chu kum 57 a ni.
2) Candidate naupang ber chu Serlui biala ding tur Lalhmachhuana a ni a, kum 34 a ni.
3) Candidate upa ber chu Serchhip leh Champhai South-a ding tur Lal Thanhawla a ni a, kum 80 a ni.
4) Mi 12 - Lalrindika Ralte, Lalhmachhuana, PC Laltlansanga, C Lalhlimpuia, K Vanlalrawna, C Lalhlimpuia, James Thanghmingmawia, Lalnunthara, LT Hrangchal leh Sangzela Tlaute chu ṭum khat candidate an nihna tur a ni.
5) Mi pathum - Joseph L Ralte, Rosiamngheta leh Dr CT Tluanga te chu MLA inthlan hnuhnung bera party dang candidate an ni.
6) MLA inthlan hnuhnung bera Congress candidate tling zo lo Dr Lalmalsawma leh H Liansailova te an bial ngaiah an ding nawn.
7) MLA ni lai - JH Roṭhuama, PC Zoram Sangliana, Hmingdailova Khiangte, K Lalrinthanga, R Lalrinawma, Lalrinmawia Ralte leh R Romawia candidate an ni tawh lo.