Serchhipah RTI Week hman a ni
Nimin khan Serchhip DC pisa conference hall-ah RTI Week 2018 hman a ni a; sorkar department hrang hranga SPIO leh SAPIO te, tlawmngai pawl aiawhte, V/C aiawhte leh thuthar thehdarhtute an tel , district bawrhsap Sangchhin Chinzah-in a hmanpui.
Sangchhin Chinzah chuan, khua leh tuite'n sorkar hmalakna hrang hrang an hriat ve vek theihna chanvo petu RTI Act a ni tih sawiin, "Mipui tan mai pawh ni loin, keini sorkar hnathawkte tan hlei hlei hian a ṭha a ni. Mipuite'n kan la hmang ṭangkai tâwk lo a nih pawhin, kan changkang tial tial ang a, kan chanvo hriat duhna a pung tial tial ang a, RTI Act hi kan la hlut tial tial dawn a ni," a ti.
Serchhip DC chuan, RTI Act hriatna kawngah SPIO leh SAPIO-te pawh an intuaithar reng a ṭul thu a sawi a; RTI Week hmannaa kalkhawmte chu an thu hriat tharte ṭangkai taka hmang turin a chah.
RTI Week hmannaah hian resource person Ngurthansanga, Serchhip SDC-in RTI Act hmanga zawhna zawh dan leh hriat tur ṭulte a sawi a; Settlement officer C Lalduhzuali'n RTI Act hmanga zawhna chhan dan (SPIO/SAPIO-te mawhphurhna) a sawi thung.