Rural Development & Steel Minister hoin Mizorama hnathawhte thlirho a ni

Union minister of state for Rural Development and Steel Faggan Singh Kulaste chuan nimin khan Mizoram a rawn tlawh a; nimin vek khan Rural Development (RD) department hotute Aijal Club-ah kâwmin, sorkar laipui scheme kalpui dan, hmachhawp leh harsatnate a sawipui.

Faggan Singh Kulaste chuan, RD department hotute chu thingtlang mipui tan hmasawnna hna hrang hrang an thawh bakah, thingtlang mipuite'n eizawnna kawng hrang hrang an neih theihna atana eizawnna siamsak thei chi scheme-te ngai pawimawh turin a chah a, "Hemi kawngah hian self help group (SHG)-te chu ṭangkai tak an ni thei a, nasa zawka chawi lârnaah ṭan la ang che u," a ti.

Union Minister chuan, thingtlang mite'n thla bìa sum lak luhna kawng ṭha an neih theih nan sorkar laipui scheme hrang hrangte a ṭangkai thei ang bera hman a duh thu a sawi a; MGNREGS hnaa third party audit endikna ngaih pawimawh a duh thu a sawi bawk.

Inkawmhonaah hian MGNREGS, PMAY-G, SPMRM, BADP, PMKSY, NURM leh DDU-GKY hnuaia hmalaknate thlirho a ni.

Tarlan danin, MGNREGS-ah hian khaw 858-ah job card holder 2,07,875 an awm mek a; sorkar kum kal mekah district tinah ni 90 aia tam inhlawhna siam ni tawhin, March 2022 ral hmain ni 100 inhlawhna siam theih an beisei. MGNREGS hnuaia hnate geo-tagged kawngah phase-I ah Mizoram chu state zinga ti ṭha ber a ni.

SPMRM chu RD block palia cluster paliah kalpui mek a ni a; Aibawk cluster-a hnate zawh a ni tawh a, Thingsulthliah, East Lungdar leh Khawzawl cluster-ah hna a kal mek.

BADP chu RD block 15-ah kalpui mek a ni a, Myanmar ramri depa awm khua 108 leh Bangladesh ramri depa awm khaw 142 a huam. PMKSY chu RD block 18-ah kalpui tum mek a ni a, ram hectare 44,600 a huam dawn a ni.

Rural Development & Steel minister Faggan Singh Kulaste hian nimin chawhma dar 10:35 khan Lengpui Airport a rawn thleng a, minister of state Robert Romawia Royte leh sorkar hotute'n an lo hmuak a ni.