MP Vena leh Korea Ambassador inkâwm
Rajya Sabha MP K Vanlalvena chuan February 10, Ningani khan New Delhi-ah India rama South Korea ambasador HE Chang Jae-Bok chu Korean Ambassador pisaah a kâwm a; Mizorama Korean ṭawng zirna hawn a nih theih nana hma lakpui turin a sáwm.
MP K Vanlalvena chuan, Mizo ṭhalai tam takin Korean film leh culture an ngaihsan thu leh an nun dante an entawn nasat thu sawiin, "Mizo ṭhalai zingah Korean ṭawng thiam châk leh zir duh mi eng emaw zat an awm a, Korea rama hna thawk duh tur pawh an tam ka ring," a ti a; Mizorama Korean ṭawng zirna hawn a nih theih nan a theih dan ang anga hma lakpui turin a sâwm a ni.
HE Chang Jae-Bok chuan MP sawmna chu tihhlawhtlin ngei a tum thu a sawi a, Korean company-te biain hma a lak tur thu a hrilh. Tun hmain Mizoram a la hriat ngai loh thu leh Mizo ṭhalaite zingah Korean ṭawng thiam châk an awm chu an tan thil lawmawm leh hmalak phûrawm tak a nih thu a sawi bawk.
MP hian Korean Ambassador hi Mizoram calendar leh khiangkawi ipte a pe a; Delhi Mizoram House additional resident commissioner Alexander V Chawngthu-in a ṭawiawm a ni.