PC party-in power tariff tihsan an duh loh thu JERC-ah an thlen

PC party chuan, Mizoram sorkarin kawlphetha hman man (power tariff) tihpun a tum chu an duh loh thu leh an dodal thu nimin khan Joint Electricity Regulatory Commission for Manipur and Mizoram (JERC)-ah an thlen.

PC party chuan, "Power & Electricity department-in kum 2022-23 chhunga mipui hnena electric power pekna senso tura cheng vbc. 762.42 mamawh tura inchhût a, hemi behchhana nasa taka bill tihpun JERC-a dilna an thlen ngawt hi mipui sum rawk tumna lian takah kan ngai a, kan duh loin kan dodal tak zet," an ti.

PE department-in JERC-a rawtna an thlen kalhmangah PE department chu corporation anga kal ni mai àwmin an inlantir nia sawiin PC chuan, "Department-a thawktute hlawh leh thil dang hrang hrang, mipui pawisa aṭanga sorkarin a pek tur thote pawh an senso tura an chhût tel vek mai hi a dik thei lo," an ti a; sorkar chu felhlel taka hma laah an puh.

PC party chuan, mipui sum aṭanga sorkarin pawisa a pek tur leh power subsidy atana sorkarin mipui pawisa a pek turte nena chhût kawpin, electric bill chu a pun a ngai lo a, tihtlem theih a ni zawk nia sawiin, "Hmun dang aṭanga power leina man tihpun a awm chuang lo niin a lang. Chuvangin, bill tihpun tumna hi duh loin PC party chuan hma la turin JERC kan ngen a ni," an ti.

PC party tarlan danin, Electricity Act hman mekah power sem darh hna chu corporation kuta dah tura tih a ni a, mahse, Mizoram sorkarin tun thlengin a la tihlawhtling lo. Sorkarin a tih tur tihlawhtling si loin, mipui phurrit belh chhah turin, hre reng chungin dik lo takin corporation-te tih dan turin sorkarin thil a ti a, kum eng emaw zat chhung chu bill tihpun a lo ni tawh a ni.