Assembly Budget Session-in March 10 thleng a awh dawn

February 22, 2022-a ṭan tur Mizoram Legis­lative Assembly pariatna session pakuana chuan March 10, 2022 thleng a awh dawn. Tun ṭum session hi budget session a nih angin kum 2022-23 chhunga Mizoram budget pharh a ni ang. Speaker Lalrinliana Sailo kaihhruai chuan session programme an duang tawh a ni.

Ruahmanna an siam dan chuan, Assembly session ṭan niah Governor Kambhampati Hari Babu-a'n thu a sawi ang a, a tûkah Governor thusawia lawmthu sawina motion sawiho a ni ang. Kum 2022-23 Mizoram budget tur chu February 24, 2022-ah Finance changtu chief minister Zoramthanga'n a pharh ang.

February 22 aṭanga March 10, 2022 chhunga session neih turah hian Inrinni leh Pathianni bakah, March 4 (Chapchar Kût)-ah chawlh a ni dawn a; Assembly session atan hian zawhna leh chhanna, paper, bill leh rules-te a lut ṭan mek a ni.