KHAWTHLIR

Thisen pe
Khawzawl College NSS unit chuan DC Office nen ṭang rualin nimin khan an college hall-ah thisen pek an huaihawt a, Champhai District Hospital blood bank tan thisen unit 90 an pe a, petute mipa 55 leh hmeichhia 35 an ni. 05 Riders, Kolasib pawhin nimin vek khan Kolasib District Hospital-ah thisen unit 8 an pe bawk.

Governor kâwm
Lehlanga Mizorama rawn zin Union minister of state for Rural Development & Steel Faggan Singh Kulaste chuan nimin khan Governor Dr Hari Babu Kambhampati chu Raj Bhavan-ah a hmu a, Mizoram kaihhnawih thil chi hrang hrang an sawi dun a ni.

Dilna ngaihtuah
Local/ village task force mi, an duty laia Covid-19 kaia hripui vanga thi zuite sorkarin cheng nuai 20-a a ràlna (ex-gratia) a pek tur chungchang ngaihtuahin Claim Approval Board chu an ṭhukhawm a, dilna pahnih pawmin, dilna pakhat chu document enfel ngai a la awm avangin an pawm rih lo. Hripui vanga task force mi thite sorkarin a ràlna turah hian dilna pariat lut tawh zinga panga pawm a ni tawh a, pahnih chu sum pek tawh a ni.

Hmeichhe khawmpui
Mizoram Presbyterian Kohhrana Kohhran Hmeichhiate chuan nizan aṭang khan bial inkhawmpui an hmang ṭan a, vawiinah rorel inkhawm neih a ni ang. Bial hmeichhe inkhawmpui hi February thla Pathianni vawi hnihna behchhanin neih a ni ṭhin a, kuminah hian hripui lêng avangin dan pangngai anga neih theih ni lo mah se, pastor bial tam takah chuan vawiinah ro an rel ang a, naktukah inkhawm a awm ang. Zan lamah inkhawm a awm lo.

RAHC thar hawng
Lungtian khuaa Rural Animal Health Centre office sak thar chu nimin khan bialtu MLA H Biakzaua'n a hawng. H Biakzaua chuan, Rural Animal Health Centre chu Lungtian leh a bul hnai khuaa ran vulhtute'n ṭangkai taka an hman a beisei thu a sawi. In sak nan hian Rs 18,00,000 hman a ni.