Larsapin department hotute a kâwm

Governor Dr Hari Babu Kambhampati chuan nimin khan Raj Bhavan-ah Horiticulture, PWD leh Agriculture department hotute a kâwm a; bamboo link road project kalpui dan tur te, hmasawnna hna leh scheme hrang hrang kalpui dante a sawipui.

Horticulture leh PWD hotute chuan, PM-DevINE hnuaia Mizorama hmalakna tur bamboo link road chungchang an sawifiah a; kawngpuiin a tlawhpawh loh mau chìnna hmunahte lirthei tlân theihna turin kawng sial a ni dawn a, senso tlem zawka mau chìnna hmun aṭanga a zawrhna hmun leh a leitute hnen phurh thlenna atan ruahman a nih thu an sawi.

Governor chuan, bamboo link road project chu a hun taka thawk zo ngei turin sorkar hotute chu a chah a; hlawhtling taka kalpui a nih chuan sorkar laipui aṭanga sum tam zawk hmuh belh a awlsam dan tur leh dragon fruit plantation chungchang a sawipui.

Agriculture department hotute chuan, loneitute tana hmasawnna hna hrang hrang department-in a thawh dan leh central scheme an kalpui dante Governor an hrilhfiah a ni.