MNF hi mahni nunna dahkham ngam ram tana lo inpete awmna a ni - Zawma

MNF vice president Vanlalzawma chuan, MNF party chu an danglam nia sawiin, "Mahni nun­na pawh dahkham ngam, nupui fanau leh chhungte pawh kalsan ngam khawpa ram tana lo inpete awmna pawl a ni," a ti.

Nimina Lungleia Mizo Hnam Runa lawm luh inkhawmah thu sawiin Vanlalzawma chuan, MNF-te chu an chêt ziaah MNF an ni tih an tilang fo tur a nih thu sawiin, "MNF hian Pathian hruaina a chan avangin diamond jubilee kan thleng thei a ni a, Pathian hian hruai lo se la chuan a ral ve daih tawh ang," a ti a; Pathian enkawlna leh kaihhruainaah an ṭhatna tur leh an chhiatna tur a innghah thu a sawi.

MNF adviser Lalruat­kima pawhin thu sawiin, MNF sorkar leh Congress sorkar mipuiin an khai­khin a, mipuite'n Aigupta sa bél an ngai lo hle tih a chiang niin a sawi a, "Anmahni an inen let a, an mangang lutuk chuan an hotupain ṭhat loh theih lohna báwm a zuar a, a zuartute kha a ngai reng an ni. Kum 10 kal taa ṭha duh reng reng lote kha han ṭhat thar thutna tur an nei lo," a ti.

Congress hun laiin Assam sorkarin Mizoram ramri an chhuhsak nia sawiin Lalruatkima chuan, "Kan zirlaite leh kan ṭhalai, ram chhan tura kalte'n vai kut an tuar a, Mizo civil-te lamah silai a puak a, Zoram hi a ṭap a nih kha," a ti a; ram neitu party MNF sorkar erawh chuan vai sipaite'n Mizoram an luahte an chhuhsak niin a sawi.

Lalruatkima chuan, MNF manifesto tihhlawh­tlin tawh tam tak an nei tawh nia sawiin, "Kan la tihhlawhtlin hman lohte zingah pawimawh hmasa tih thlirin, decentralisation of power lam kan han hawi a, Lunglei Municipal Council, Congress sorkar laia a pek duh loh kha tunah chuan hman a lo ni dawn ta," a ti a; Lunglei tan hmasawnna ruangám lian pui pui a insehmur mek niin a sawi.

MNF thuchhuah tar­lan danin, nimina lawm luhna inkhawmah hian Lungleia ZPM hruaitu ṭhin SL Chhunga leh K Vanlalvena bakah, mi dang pakua MNF-ah an lawm lut a ni.