Lalsawta hi CM atan kan hual a ni - Zodintluanga Ralte

Congress Legislature Party (CLP) leader leh MPCC treasurer Zodintluanga Ralte chuan, MPCC president Lalsawta chu Congress party-in chief minister atana an hual a nih thu a sawi.

Zodintluanga Ralte hian nimin khan Tuipang Gospel Centenary Square-a vantlang inkhawmah thu sawiin, "MPCC president Pu Lalsawta hi chief minister atana Congress party-in kan hual a ni. Mi dik leh rinawm, eirûknaa fihlim, sum enkawlnaa hmingṭha em em a ni a, a ho hian kum 2023 MLA inthlanah kan chak ngei pawh kan ring," a ti a; sorkar ṭha siam tura thawhpuiah Mizoram mipui a sáwm.

Sum leh pai enkawlah MNF sorkar a hlawhchham nia sawiin Zodintluanga chuan, "Congress sorkarin sum tam tak kan hnutchhiahte chu awmze nei loin an eizo vek a, sorkar hnathawkte hlawh an pe thei lo a, sum leh pai harsatna khurpuiah min luhpui a ni. Pensioner-te'n pension pawisa an la thei lo. Chutiang taka finance management-a hlawhchham MNF sorkar kan hrawn mek a ni," a ti a; Congress sorkar laiin sorkar hnathawkte'n GP fund an duh zat zat an la thei a, a hun takah hlawh an lak ṭhin thu a sawi.

CLP Leader chuan, MNF chu Mizorama chhiatna thlentu an nia sawiin, "MNF an len apiangin kan ramin buaina a tâwk ṭhin. An ropui vanglai takin ram a buai a, kum 20 zet ṭah leh ha ṭhialna ramah min hruai lut. Kum 1998-ah MNF an sorkar a, hel pawl an hluar a, ṭàm a tla a, hel hoin mi an kidnap a, Aizawl daiah zalen takin hel hoin camp an nei a ni," a ti.

Zodintluanga chuan, MNF sorkarin Referral Hospital an tihchhiat veh tawh leh zangnadawmna nasa lutuk vanga Tuirial Hydel Project hluihlawn tawh chu Congress sorkarin an tihpuitlin thu te, HPC(D) nen inremna siam a nih thu te, Falkawnah medical college din a nih thute a sawi. MNF sorkar hnuaiah autonomous district council-ah sorkar nghet a ding ngai lo a, state sorkarin mipui thlan sorkartir loin an tihbuai ṭhin thu a sawi bawk.

Tuipanga vantlang inkhawmah hian MPCC general secretary Lalrindika Ralte, MLA leh MPCC secretary Rosiamngheta te pawhin thu an sawi a ni.