MLC Book of the Years atan RL Hmangaiha ziah 'A tlafir'

Mizo Literature Club (MLC), Myanmar chuan February 8, 2022 khan Tahan Mission Veng MYA Chapel-ah MLC Day an hmang. MLC din ṭan kum 2015 aṭanga kum 2021 chhunga Myanmar-a Mizo kut chhuak lehkhabu ṭha thlanna, MLC Book of the Years atan RL Hmangaiha ziah, 'A tlafir' tih lehkhabu an thlang.

MLC Day hmannaah hian MLC Book of the Years dawngtute hnenah lawmman an hlan bakah, Myanmar-a Mizo zinga ziak mi, chawimawi phu mi eng emaw zat hnenah chawimawina an hlân a ni.

MLC Book of the Years-ah hian pakhatnain kyat 3,00,000, pahnihnain kyat 2,00,000 leh pathumnain kyat 1,00,000 an dawng a, trophy leh thuchei an dawng ṭheuh bawk. Lehkhabu ṭha pahnihna chu Lalṭhuamliana ziah, 'Zinna leh zirna' tih a ni a, pathumna chu Dr J Khuma ziah, 'Zo bangla' tih lehkhabu a ni.