Siaha DC leh MJA an inkâwm

Siaha bawrhsap Lalsangliana leh Siaha District MJA member-te chu nimin khan DC conference hall-ah an inkawm a, hmalakho theihna tur hrang hrang an sawiho.

Lalsangliana chuan, Siaha district-a a awm chhungin hmasawnna kaihhnawih hnathawh bakah, mipui rawngbawl hnaah theihtawp a chhuah tur thu sawiin, MJA member-te chu thawhhopuiah a sáwm a, "Thawhhona ṭhain district hmasawnna kawngah rah duhawm a chhuah ngei ka beisei," tiin, thuràwn pe hreh lo turin a chah.

Mipui zirtirna leh khawtlang nun kaihhruaina kawngah chanchinbumite mawhphurhna a san thu sawiin Bawrhsap chuan, "Mipuite'n thu dik leh belhchian dâwl an hriat theih nan thawk zel ula, thawhhona ṭha nena ke pên a, hma in lak chuan district tan rah ṭha a chhuah ngei ka beisei," a ti.

Siaha District MJA president M Baithai pawhin thu sawiin, mipuite'n an harsatna leh mamawhte Mizo ṭawng ngeia an thlen theihna tur Bawrhsap thar an nei chu an thlamuanpui thu a sawi a; MJA leh mipuite'n beiseina sang tak an neih thu leh thawhhopui an inpeih reng thu a sawi bawk.

Siaha district-ah hian MJA member 12 an awm mek a, chu'ng zinga pahnih chu prominent journalist an ni.