A záwnin ni 20 chhung positivity rate 20% aia sang a ni tawh

February 10, Ningani khan Mizoramah Covid-19 vei mi 1,641 hmuh chhuah a ni a, positivity rate 25.04% niin, a záwnin ni 20 chhung positivity rate 20% chung lam a ni tawh. Nimin khan hripui vei dam tawh mi 1,883 chhuahtir an ni a, hripui vanga thi an awm lo.

Covid-19 vei hmuh thar mi 1,641-te chu mipa 705 leh hmeichhia 936 an ni a; RT-PCR laboratory-a hmuh chhuah 311, TrueNAT hmanga hmuh 100, RAT hmanga hmuh 1,201 leh FIA hmanga hmuh 29 an ni.

Ningania Mizorama sample endikah district zawng zawngah positivity rate 10% chung lam vek a ni a, district pakuaah 20% chung lam niin, district pathumah 30% chung lam a ni. Positivity rate sànna ber Serchhip district-ah a tling a, Saitual leh Kolasib district-ah 20% a tling lo.

Mizoramah ni 20 chhung a záwnin Covid-19 positivity rate 20% chung lam a ni tawh a, January 22, 2022 aṭang khan ni tin positivity rate 20% aia sang vek a la ni. Positivity rate 30% chung lam a awm nual bawk.

Nimin tlai dar 5 thleng khan hripui vei dam tawh mi 1,883 chhuahtir an ni a; district tina chhuak zat chu - Aizawlah mi 1,173, Lungleiah 166, Mamitah 161, Champhaiah 105, Serchhipah 84, Saitualah 79, Lawngtlaiah 37, Kolasib-ah 30, Siahaah 25 leh Hnahthialah mi 23 an ni.

IDSP record angin, Mizoramah Covid-19 vei 1,93,367 hmuh chhuah a ni tawh a, mipa 90,885 leh hmeichhia 1,02,482 an ni a, mipa aiin hmeichhia 11,597-in an tam zawk. Nimin tlai dar 5 thleng khan mi 1,81,931 (94.09%) chhuahtir an ni tawh a, mi 634 (0.33%) thi tawhin, enkawl mek mi 10,802 (5.58%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 1,93,367 chu mi 1,000 zelah hripui vei mi 176 an awm ang a ni a; mi 1,00,000 zela Covid-19 vangin mi 57 an thi tawh ang a ni tih sorkar thuchhuakin a tarlang.

Mizoramah February 8, 2022 thlenga swab sample endik tawh 17,43,867 aṭanga RT-PCR hmanga endik zat percentage chu 20.64 a ni a, RAT hmanga endik zat chu 73.68% a tling.