MPYCC-in thu dik puang turin sorkar phût

Mizoram Pradesh Youth Congress Committee (MPYCC) chuan, kuhva tawlh rûknaa inhnamhnawiha puh Abu Mazumdar chungchangah mipui hnena thu dik puang turin Mizoram sorkar an phût.

MPYCC chuan, November 25, 2021-a Delhi-a Assam chief minister Himanta Biswa Sarma leh Mizoram chief minister Zoramthanga te zanriah an kil dunnaah Abu Mazumdar chu Assam CM páwla tel ni loin, Mizoram CM páwla tel a nih thu Assam CM political secretary Jayanta Malla Barua-a'n statement siamin a tarlang a, Mizoram CM Office lamin phatna an siam thung tih an tarlang.

Mizoram leh Assam CM-te'n zanriah an kil dunnaa Abu Mazumdar a tel ve chungchangah thu a saisa tih sawiin MPYCC chuan, "Mizoram mipui hian thu dik kan hriat hi kan dikna chanvo a ni a, thu dik chiang taka mipui hnena puang turin Mizoram sorkar kan phût a ni," an ti.

Congress ṭhalaite chuan, Abu Mazumdar-a'n Mizoramah buhfai a supply mek tih thu buhfai phurtute leh mipui titi a ni mek tih sawiin, Abu Mazumdar chu Mizoram sorkar hnena buhfai supply-tu a ni rêng em tih puang chiang turin Mizoram sorkar an phût bawk.