Sorkar hnathawk zawng zawngin Lungawi lohna an lantir dawn

Mizoram sorkar hnathawk pawl hrang hrangte intèl khawm­na, Federation of Mizoram Government Employees and Workers (FMGEW) chuan an thil phût hrang hrangte sorkarin a tihhlawhtlin loh avangin February 21, 2022 aṭangin lungawi lohna lantir an tum.

Thu dawn danin, FMGEW hruaitute chu an thil phûtte Mizoram sorkarin a tihhlawhtlin loh avanga hmalak dan tur ngaihtuahin February 11, Zirtawpni khan an ṭhukhawm a; lungawi lohna lantir nan leh sorkar kar nan February 21-25, 2022, kar leh chhung zawng office leh hna an thawhna hmunah badge dum bel an rêl a ni.

FMGEW hian an pawla tel pawl (association) zawng zawngte chu an pawl ṭheuha a ṭul anga hma la turin an hriattir a, badge dum bel tur chu mahni pawlah ṭheuh ngaihtuah tur leh member-te'n FMGEW thuchhuak an zawm ṭhat leh ṭhat loh vil turin an ti bawk.

Badge dum an bel hnua sorkarin an thil phût a tihhlawhtlin loha an kal zel dan tur chu March 1, 2022 khian FMGEW Council Meeting neiha rêl leh an tum a; Council Meeting-ah hian aiawh pakhat ṭheuh intir turin pawl tin an hriattir nghal a ni.

FMGEW thil phûtte
1. Dearness allowance tihpun an phût: Sorkarah DA tihpun dilna ziakin vawi li an thlen tawh a, vawi tam tak sorkar hotute an sawipui tawh bawk a, tun thlengin tihhlawhtlin a la ni lo. Pay Rules hman mekin a tarlan dangin, DA hi sorkar laipui hnathawkte rate ang state sorkarin pek ve zel tur a ni a, sorkar hnathawkte'n July 1, 2021 aṭangin DA 31% an lak tawh bakah, January 1, 2022 aṭangin 3%-a tihpun belh tur a nih tawh laiin, Mizoram sorkar chuan 17% a pe mek a ni.

2. A hun taka hlawh lak zel an phût: Supreme Court-in February 8, 2021-a order a tihchhuahah, sorkar hnathawkte chu a hun taka hlawh pek ṭhin tur an nih thu leh pek tlai an nih chuan a pung (interest) nen pek tur a tih laiin, hun eng emaw chen aṭang khan Mizoram sorkarin a hnathawk eng emaw zat chu hlawh a pe tlai ṭhin.

3. Pension hamṭhatna pek an phût: Hun eng emaw chen aṭangin sorkar hnathawk châwl (retire)-te'n an chanvo, pension leh hamṭhatna dang an hmuh tur ang an hmu thei lo a, rei tak hrènsak ṭhin an ni.