Kuhva rah tawlha sumdawng Meth kaihhnawihah man a ni

Mizoram leh Assam-a BSF sipaite leh Excise & Narcotics department (END) ṭangkawp chuan February 11, 2022 tlai dar 3:10 khan North Chhimluang, Kolasib district-ah methamphetamine (meth) kg. 12 leh gram 800 an man a; meth neitua puh zinga mi Shamir Deb (49), Sonai Road, Silchar, Assam chu dan loa kuhva rah tawlh ruka sumdawng ṭhin nia thu dawn a ni.

Vanglaini thu dawn danin, BSF-te hian report an dawn bawhzuiin meth phurtu lirthei an ûm zui a, thawhpuiah Kolasib-a END enforcement an sáwm a ni. February 11 tlai dar 3:10 khan North Chhimluanga kuhva kudam bulah meth chu an man a, a neitua puh mi pahnih - Shamir Deb leh Solomon Zonunmawia (35), Khawmawi, Myanmar an man nghal.

Meth an manna hi kudam hung pawn chiah kawngpuiah a ni a, Mizoram BSF leh END enforcement-te thlen hmain Assam-a awm BSF sipaite an thleng hman a, meth phurhna nia hriat lirthei bul kawngpuiah meth chu an man a ni. Meth an manna bul kudam luahtu chu Shamir Deb a ni a, ani hi kuhva rah bakah, Myanmar aṭanga lak luh thil dang hmanga sumdawng ṭhin a ni.

Shamir Deb hian hun eng emaw chen chu sumdawnna atan kuhva a hmang a, North Chhimluanga a kudam bulah hian in sain, chutah chuan Mizorama a awm lai chuan a khawsa ṭhin. Hetih lai hian, END chuan meth man leh kuhva rah sumdawnnain inzawmna a nei lo niin an sawi.

Shamir Deb leh Solomon Zonunmawia lakah hian Vairengtea END-te'n thubuai an ziak lut a, mahse, Solomon-a hian Covid-19 a vei avang leh Shamir Deb chu a kaihhnawih hnaivai (first contact) a nih avangin magistrate remtihnain venhimna hnuaiah Jordan Centre, Seṭhawnah awmtir rih an ni. Hripui laka an fihlim hnuah END chuan thu zawhfiah turin an la leh ang.

Hetih lai hian, meth chung­changa report dawng hmasatu BSF-te chu thubuaiah hian thuhretuah an ṭang duh lo a, thuhretua ṭang tura ngen an nih pawhin an pute'n rem an tih loh thu an sawi nia thu dawn a ni.