Kamlova Chhangte ST certificate titawp turin CYMA-in hma la dawn

Central YMA chuan, hnam dang, Kamlova Chhangte tia invuah hnena schedule tribe certificate pek chhuah chu titawp (cancel) turin Mizoram sorkara thlen an tum.

February 11, Zirtawpnia Central YMA Committee Room-a YMA Central Executive Committee ṭhukhawm chuan, Kamrul Uddin nia hriat, Kamlova Chhangte tia hming thlaka tribal certificate pek chhuah chu a tribal certificate cancel thuai a nih theih nan chak taka hmalak an rêl a ni.

YMA CEC chuan, tribal certificate dilnaa YMA hriatpuina pek ṭhin chu fimkhur taka kalpui chhunzawm zel turin an rêl nghal bawk.

Document thlalaka a lan danin, Kamlova Chhangte s/o Tlangchhuana Chhangte, Ṭhuampui, Aizawl hnenah hian June 27, 2018-ah schedule tribe certificate pek chhuah a ni a, ST certificate-a hming ziaktu chu JH Lalrimawia, additional DC (G), Aizawl district tih a ni.

Kamlova Chhangte ST certificate chu an pawm theih loh avangin Mizo Students' Union (MSU) Gen.Hqrs chuan November 23, 2021 khan thuneitute hnenah cancel tura ngenna an lo thehlut tawh a ni.

February 11-a Central YMA hruaitute president R Lalngheta kaihhruaia ṭhukhawm chuan December 16, 2021-a YMA General Conference vawi 73-naa rorelte bawhzui dan tur leh thil pawimawh dangte an rel bawk.