HSLC leh HSSLC exam-ah khauh tum

Mizoram Board of School Education (MBSE) chuan thuchhuah siamin, kumina HSLC leh HSSLC examination chu khauh taka kalpui tum a nih thu an tarlang a; Covid-19 vanga harsatna tawk an awm a nih chuan, kum hloh loa an exam theih dan tur ngaihtuah a nih dawn thu an sawi bawk.

MBSE chuan, HSLC leh HSSLC examination chu kumin February leh March thla chhungin buatsaih tum a nih thu an tarlang a, "Covid-19 léng avangin rei tak sikul khâr a ni a, class a pangngaia kalpui theih a nih loh avangin Board exam hi kum dang aia strict lo emaw, ngaihhnathiamna tam deuh turah emaw ngaih theihte pawh a ni. Amaherawhchu, MBSE chuan dik leh felfai takin, kum dang ang bawka strict-in conduct a tum a, thu awih lo lui an awm chuan hnawhchhuah (expulsion) thleng pawhin hmalak a ni dawn," an ti.

Covid-19 vanga harsatna tâwk an awm palh a nih chuan kum hloh loa an exam theih ngei dan tur ngaituahsak a nih dawn thu MBSE chuan an tarlang a; exam thianghlim leh felfai a awm theih nan zirlai, mipui, nu leh pa leh zirtirtute thawhpuiah an sáwm a ni.

Kumina HSLC exam turah hian February 28 - March 16 chhungin theory exam tur niin, March 17-22 chhungin practical exam a awm dawn a; exam centre 117 awmin, candidate 18,357 an awm.

HSSLC exam turah chuan exam centre 90 awmin, candidate 12,301 an awm a; vawiin February 14 aṭangin practical exam a ni dawn a, March 1-25 chhungin theory exam a ni ang.