Property tax tihsan a ni dawn

Aizawl Municipal Corporation (AMC) chuan sorkar kum thar, April 2022 aṭangin AMC huam chhungah property tax an tisang hret dawn a, an tihsanna zat tur chu 0.42% a ni.

Vanglaini palai zawhna chhangin Aizawl mayor Lalrinenga Sailo chuan, sorkar laipuiin GSDP ṭhanna ang tala property tax tihsan an beisei tih a sawi a, "Hmasawn ve zel turin sorkar laipui hian corporation-te min beisei a, tihsan loh chuan fund hrêk thlengin an rawn sawi a ni," a ti.

Mayor chuan, property tax chu 3%-a lak mek a nih thu leh tihsan a nih hunah chuan 3.42%-a lak tur a nih thu sawiin, "Kan tihsanna tur chu 0.42% chauh a ni. Kan ennawn khát hrim hrim a, a tìra lak kha tun ṭum hi vawi khat ennawnna a ni," a ti a; AMC chu India rama property tax la hniam ber zinga mi a nih thu a sawi.