Lunglei Fire Station-ah driver 1 chiah a awm

Lunglei Fire Station-ah thawktu mi 15 an awm mek a, chu’ng zingah chuan driver (attach) pakhat chiah a awm. Kum 2021 chhung khan Lunglei Fire Station hian kângmei chhuk ṭum 29 an ṭhelh.

Lunglei aṭanga Vanglaini thu dawn danin, Lunglei Fire Station hian kum 2021 khan kângṭhelh motor thar TATA 712 BS-6 an dawng a, kang ṭhelhna hmanrua pawimawh eng emaw zat a chhawm nghal. An hman lai, Ashok Leyland erawh chu Serchhipah dah a ni thung.

Tun dinhmunah Lungleiah hian kangṭhelh motor pahnih - TATA 712 BS-6 leh TATA 407 BS-3 an kawl mek a, TATA 407 zawk chu workshop-ah dah mek a ni.

Lunglei Fire Station-ah hian thawktu 15 an awm mek a, chungte chu - station officer pakhat, leading fireman pakhat, fireman panga, IV grade pakhat bakah, 2nd Battalion MAP aṭangin havilder pathum, naik pakhat, constable pahnih leh driver pakhat pawh (attach) an ni.

Driver pakhat, MAP aṭanga pawh chawp chauh a awm avang hian fireman panga zinga pakhat chu driver anga chhawr a ni a; lirthei khalh thei mi pahnihte chu chhun leh zanah a inchhâwkin an duty ṭhin.

Helicopter service ní-ah helicopter ṭum lai leh thlawh chhuah laiin kângṭhelh motor a awm tel ziah a ṭul a, hetih hun lai hian kângmei chhuak emaw, rîkrum thil a awm a nih chuan lirthei khalh thiam duty lo zawk chu emergency-a koh chawp a ngai a ni.