BJP sorkarin Mizoram a ngai pawimawh - Union Minister

Union minister of state for Rural Development & Steel Faggan Singh Kulaste chuan Narendra Modi kaihhruai sorkar laipuiin Mizoram a ngaih pawimawh thu a sawi.

Faggan Singh Kulaste hian February 11, Zirtawpni tlai khan Mizoram BJP pisaah thuthar thehdarhtute kâwmin, BJP sorkarin ram leh mipui hmasawnna atan theihtawp chhuaha ṭan a lak thu a sawi a, "India ram hmun hrang hrangte ang khatin a en a, hmarchhak state-te pawh a ngai pawimawh. Union budget pharh tâkah pawh Mizoram tan sum tam tak dah a ni. BJP kaihhruai sorkar chuan India ram hmasawnna atan theihtawp chhuahin hma a la zel dawn," a ti.

Sorkar laipuiin thlei bik a neih loh thu sawiin Union Minister chuan, "India rama cheng zawng zawngte ang khat vekin a en a, mipui hmasawnna hi a duh ber a ni," a ti a, BJP ni kher lote pawh an en hran loh thu a sawi.

Faggan Singh Kulaste chuan, Covid-19 léng karah India ramin hmasawnna kawng a zawh zel nia sawiin, "Hripui avanga buaina karah India ramin hmasawnna lamtluang a zawh zel a, a la zawh zel dawn. Hmun hrang hrangah hmasawnna chi hrang hrang hmuh tur a awm zel. PM Narendra Modi hi ram dangte pawhin an fak leh ṭha an tih rawn a ni a, a kaihhruaina hnuaiah India ramin hmasawnna kawng a zawh zel dawn a ni," a ti.

Thuthar thehdarhtute a kawm hma-a an party mite hma-a thu a sawinaah Faggan Singh Kulaste chuan, "Mizoramin central-a matching share tur aneih loh vang leh utilisation certificate a thehluh theih loh avangin Mizoram sorkarin sum a dawn tur ang a dawng thei lo a, hei hi a pawi hle a ni," a ti a, Mizoram chu central chuan an ngaihpawimawh rualin state sorkarin a tih tur ang a tih theih loh avangin ngaih pawimawh tur anga ngaih pawimawh theih a nih loh thu a sawi.

Union Minister chuan kum 2014 aṭanga chhutin Mizorama sorkarna lo chelh tawhte'n Mizoram an ngaihthahin enkawltu nei lo ang maiin an kaihruai a ni tih a hriat theih nia sawiin, "Nimahsela tunah PM Modi a kaihhruai sorkar kan neih hnuah erawh nasa takin miretheite hnen thleng phak hmasawnna kan hmu zel hi a lawmawm a ni. Tin, tunah hian India ram state tinte'n inkalpawhna ṭha zawk kan neih theih nana kawngpui ṭha Mizoram tan ngei pawh kan han nei thei hi a lawmawm hle," a ti.