SANKALP hnuaiah training buatsaih

Labour, Employment, Skill Development & Entrepreneurship (LESDE) department chuan February 11, Zirtawpni khan Kolasib DC conference hall-ah ‘Skill upgradation in Mizoram under SANKALP’ tih hmangin sensitization programme an buatsaih a, Kolasib bawrhsap Dr H Lalthlangliana kaihhruaiin, eizawnna tlak thiam thil tihpunna dan tur an sawiho.

SANKALP assistant mission director Zohlupuii’n ‘Skill acquisition and knowledge awareness for livelihood promotion’ tih a sawi a; Employment officer Jordan Thangi’n craftment training scheme sawiin, Lalchhuanmawia’n PMKVY chungchang a sawi thung.

Dr H Lalthlangliana chuan, chhawr tlak ni turin hman tlak thiamna neih a pawimawh thu sawiin, “Mi dang behchhan ngai loa mahni thiamna ngei hmanga intung nung thei turin Mizo ṭhalaite’n ṭan an lak a ṭul,” a ti.

LESDE director K Lalhmingliana chuan, ram changkanna leh hausakna chu a chhunga cheng mipui thiam thil neih dan leh an thiamna an hman danah thui tak a innghat tih sawiin, “Pathianin ram leilunga hausakna a dahte leh mihring hnena theihna a pekte hai chhuaka tihpun hi mihring mawhphurhna a ni,” a ti a; skill development training centre hrang hrangah tui zawng leh thiamna tihpun nachang hriat a pawimawh thu a sawi.