February-ah hripui vei mi 21,398 hmu tawh

Mizoramah Covid-19 vei February 11, Zirtawpni khan mi 1,822 leh February 12, Inrinni khan mi 1,231 hmuh chhuah a ni a, ni hnih chhunga hmuh zat hi 3,053 niin, February thla chhungin mi 21,398 hmuh a ni tawh. Inrinni leh nimin khan hripui vei dam tawh mi 2,585 chhuahtir an ni a, mi pakhat a thi.

February 11, Zirtawpnia Covid-19 vei hmuh chhuahte chu RT-PCR hmanga hmuh 329, TrueNAT hmanga hmuh 81, RAT hmanga hmuh 1,365 leh FIA hmanga hmuh 47 an ni a, positivity rate chu 25.38% a tling. Mi 1,822-te chu mipa 821 leh hmeichhia 1,001 an ni.

Covid-19 positive February 12, Inrinnia hmuh tharte chu mipa 520 leh hmeichhia 711 an ni a; RT-PCR hmanga hmuh 250, TrueNAT hmanga hmuh 80, RAT hmanga hmuh 889 leh FIA hmanga hmuh 12 niin, positivity rate chu 26.80% a tling.

February 11-a sample endikna district 11 zinga district 10 chu positivity rate 10% chung lam a ni a, district pakuaah 20% chung lam niin, district paliah 30% chung lam a ni. Positivity rate sànna ber Champhai district-ah 40% a ni a, Saitual district-ah 10% a tling lo.

February 12-a sample endikna district 11 zinga district 10 chu positivity rate 10% chung lam a ni a, district pakuaah 20% chung lam niin, district pathumah 30% chung lam a ni. Positivity rate sànna ber Serchhip district-ah 39.56% a tling a, Hnahthial district-ah 10% a tling lo thung.

Mizoramah ni 22 chhung a záwnin Covid-19 positivity rate 20% chung lam a ni tawh a, January 22, 2022 aṭang khan ni tin positivity rate 20% aia sang vek a la ni.

Nimin tlai dar 5 thleng khan hripui vei dam tawh mi 848 chhuahtir an ni a; Inrinni khan mi 1,737 chhuahtir an ni bawk.

IDSP record angin, Mizoramah Covid-19 vei 1,96,420 hmuh chhuah a ni tawh a, mipa 92,225 leh hmeichhia 1,04,195 an ni a, mipa aiin hmeichhia 11,970-in an tam zawk. Nimin tlai dar 5 thleng khan mi 1,84,516 (93.94%) chhuahtir an ni tawh a, mi 636 (0.32%) thi tawhin, enkawl mek mi 11,268 (5.74%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 1,96,420 chu mi 1,000 zelah hripui vei mi 179 an awm ang a ni a; mi 1,00,000 zela Covid-19 vangin mi 58 an thi tawh ang a ni tih sorkar thuchhuakin a tarlang.