Mizoramah mi 8,01,954-in vaccine la tawh

Mizoramah February 12, Inrinni thleng khan mi 8,01,954-in Covid-19 laka invenna damdawi (vaccine) an la tawh a, hei hi kum 2011 chhiarpuia Mizorama mihring awm zat 10,97,206 aṭangin 73.09% a tling. Vaccine hi January 16, 2021-a pek ṭan a ni.

IDSP report-a a lan danin, Inrinni thlenga Covid-19 vaccine la tawh mi 8,01,954 zinga 6,32,059 (78.81%) chuan dose hnihna an la tawh a; dose hnihna la tawh aṭangin healthcare worker, frontline worker leh kum 60 chin chung lam mi 1,15,992 zinga mi 22,200 (19.13%)-in precautionary dose an la tawh.

February 12, Inrinni bikah mi 110 hnenah Covid vaccine pek a ni a; dose khatna 28, dose hnihna 61 leh precautionary dose 21 a ni.

Health department-in district a ṭhenah Aizawl East district-ah vaccine pek chhuah a tam ber a, sorkar leh private facility aṭangin dose 3,76,293 an pe tawh.

Aizawl West district-ah dose 2,51,865, Lunglei district-ah dose 2,01,954, Siaha district-ah dose 69,633, Champhai district-ah dose 1,48,346, Kolasib district-ah dose 1,02,293, Serchhip district-ah dose 87,020, Lawngtlai district-ah dose 1,25,890 leh Mamit district-ah dose 90,283 pek a ni tawh bawk.