Covid-19 vangin mi 636 thi tawh

Nimin khan tlai dar 5 thlengin Mizoramah Covid-19 vanga thi an awm lo a, February 11, Zirtawpni zan leh February 12, Inrinni zan khan mi pakhat ve ve an thi. Mizoramah hripui vangin mi 636 an thi tawh a, kumin February thla bikah mi 26 an thi tawh.

February 11, Zirtawpni zan dar 9:50 khan Lalnunnemi (33), Dungtlang, Champhai district chu Champhai Dedicated Covid Health Centre-ah a thi a, natna dang nei tel a ni. Covid-19 positive a ni tih February 11 vêk khan fianfiah a ni a, zanah a thi zui a ni.

February 12, Inrinni zan dar 11:20 khan MC Denghmingliana (45), Mualpui, Aizawl chu hripui vangin State Refferal Hospital-ah a thi a, hemi ni vêk hian Covid-19 vei a ni tih hmuh chhuah a ni a, natna dang nei tel a ni.