Hmun hnihah check gate siam mek a ni Kan siam zo ṭep tawh - Home Minister
Mizoram Police chuan hmun hnih - Serchhip dai Sailiamkâwn leh Sihhmuiah check gate an siam belh mek. Check gate-te hi siam zawh a ni ṭep tawh.
Vanglaini palai zawhna chhangin Home minister Lalchamliana chuan hmun hnihah check gate siam belh a nih thu a sawi a, "Check gate pahnihte hi siam zawh an ni ṭep tawh. Siam zawh a nih hunah chuan kuhva rah bakah dan phal loh thil dang chi hrang hrangte phur an awm leh awm loh endik ṭhin a ni ang," a ti.
Tarlan tawh angin, Central YMA office bearer-te chuan February 4, 2022 khan Home Minister hi a pisaah an kâwm a, ram páwn khawchhak lam aṭanga dan loa kuhva rah tawlh rûk tihtawp dan tur an sawipui. Kuhva tawlh rûk enfiahna leh danna atana check gate siam belh leh tihchangtlun dan tur chu Mizoram sorkarin a ngaihtuah turin an dah.
Home minister Lalchamliana chuan, CYMA-in kuhva check gate siam chungchanga Chief Minister hnena lehkha an thehluh chu bawhzui turin Chief Minister-in a (Home Minister) kuta a dah thu a sawi.
Inkawmhonaah hian Myanmar aṭanga Mizoram kaltlanga dan loa kuhva tawlh rûk tihtawp theih dan tur sawiho a ni a; CYMA hruaitute chuan kuhva tawlh rûk an duh loh chhan te, khawtlang leh mimal nun a nghawng dante leh hma la tura sorkar an beisei dante an sawi.
CYMA office bearer-te chuan January 19, 2022 khan CM Zoramthanga a pisaah kâwmin, dan loa kuhva tawlh rûk danna turin check gate mumal tak siam tura ngenna an thlen.
Chief Minister chuan, Myanmar aṭanga dan loa Mizorama kuhva tawlh rûk tihtawp a duh thu te, YMA-in kuhva tawlh rûk chungchang zirchianna a kalpui chu lawmawm a tih thu te, hmalak dan tur rawtna an neih hunah theihtawpa bawhzui a ṭul thu te, kuhva tawlh rûk donaah sorkar, political party-te leh tlawmngai pawl dangte ṭan rual a ṭul thute a lo hrilh a ni.
CYMA leh HM thurel
1. Sorkarin check gate hawn belh dan tur leh tihchangtlun dan tur a lo en zui ang
2. A theih ang angin check gate-a police duty-te dah belha tihchangtlun turin sorkarin hma a la ang
3. Dan loa kuhva tawlh rûk donaah YMA-te'n police-te ṭanpuiin a thawhpui ang