MYC-in Hybrid IAS Coaching a kalpui ṭan. 'UPSC coaching atana sponsorship kan pekte khan tihsual an nei lo' - MYC Chairman

Mizoram Youth Commission (MYC) chuan Alternative Learning System (ALS) nen Hybrid IAS Coaching an buatsaih a, nimin aṭang khan bulṭan a ni.

Coaching bulṭanna puala hun hmanah MYC chairman Dr Vanlalṭanpuia chuan Hybrid IAS Coaching atan hian centre pali siam a nih thu sawiin, "Mi 100 tana tih a ni a, Aizawlah seat 60, Lungleiah seat 20, Siaha leh Kolasibah seat 10 ve ve ruahman a ni. Coaching kal tur thlanna atan hian ALS-in exam an buatsaih a, chuta ti ṭha mi 100 thlan chhuah an ni. Mah se, thlan chhuah zingah hian zawm leh lo an awm," a ti.

MYC Chairman chuan seat ruakte chu panel list aṭanga hnawhkhah a nih dawn thu sawiin, "Aizawlah seat 45, Lungleiah 11 leh Kolasibah seat 8 hnawhkhah niin, Siaha-ah chuan seat 10 hnawhkhah vek a ni," a ti a, MYC chuan ṭhalaite tan theihtawp a chhuah zel dawn thu a sawi.

Sorkar kumtharah chuan IAS coaching academy-a lut turin mi 40 sponsored an tum thu sawiin Dr Vanlalṭanpuia chuan, "Chief Minister remtihnain mi 40 te sponsored kan tum a ni. Ṭhalaite thinlungah competitive exam a nun theihna atan theihtawp kan chhuah zel dawn," a ti.

A hma-a mi 20 an sponsored-te pawh khan an inremna engmah an bawhchhe loa, ṭha takin an tih tur angte an hlen vek nia sawiin MYC Chairman chuan, "Inremna angin ṭum hnih dang UPSC preliminary exam an hmachhawn leh dawn. Mi 20 zingah hian 17-in MPSC prelims an paltlang," a ti a, inremnaah thildang exam phal loh tih a awm loh thu a sawi.

Dr Vanlalṭanpuia chuan inremna angin UPSC preliminary exam an hmachhawn vek a, tling an awm lo tih sawiin, "Mi 20 te hi February 2021-ah Delhi-ah thawn niin, Covid-19 vangin loh theih lohin May thla tirah an rawn haw a ngai a ni," a ti.

MYC hotute sawi danin, Hybrid IAS Coaching hian a mitthla ber chu kum 2023-a USPC exam lo awm tur a ni. Coaching-a kalte chuan V-SAT hmangin Delhi-a ALS hmuna IAS coaching kalpui an chhim bakah, ALS mithiamte'n Mizoramah an rawn kal chilh ṭhin ang. A thlawn vekin coaching kalpui niin, study material pek vek an ni dawn bawk.