Chakai farm mualpho huamin Kan kalpui - Fisheries Minister
Cheng nuai 54.7 senna tur, Kolasib Dumlui pilot project-a kalpui mek chakai farm chu nimin zing khan Fisheries minister K Lalrinliana'n a tlawh a, project chu mualpho pui huama kalpui a nih thu a sawi. Fisheries department hotute chuan January 11, 2022 khan chakai farm kalpui mekah hlawhtlinna hmuh tur a la awm loh thu Vanglaini an hrilh a ni.
Fisheries Minister chuan chakai an khawi dan ang chu India ram hmun dangah pawh an la tih ngai loh thu sawiin, "Keimahni kut chhuak, kan ruahman chhin a ni a, a hlawhtlin ngat phei chuan state dang pawhin an la rawn entawn tur a ni. Lui chakai an ni a, hmun bika khawi hian eng ang chiahin nge an dam khawchhuah theih tih pawh kan hre loa, chu chu enchhin mek a ni. Mualpho pui huamin project siam kan ni," a ti.
Chakai chu Mizote sa ngainat a nih thu sawiin K Lalrinliana chuan, "Sa zawng zawngah a man to pawl tak a ni a, market lamah harsatna a awm lo," a ti a, chakaia intodelh theihna atan theihtawp an chhuah thu a sawi.
Fisheries Minister chuan nasa zawka luidung humhalh kawnga ṭan lak an tum thu sawiin, "Tuna Mizoramin luidung humhalhna tura dan a neih mek 'The Mizoram Fisheries (Amendment) Act 2016' hi siamṭhat belh zel niin, budget session hunah pawh rules ṭhenkhat belh ngai belh tura put luh a ni dawn," a ti.
Minister ṭawiawmtu DFDO Lallianpuii chuan chakai farm chu experiment atan chauh kalpui a la nih thu sawiin, "A hlawhtling dawn em tih hriat ala ni lo a, production awm nghal zut zut tura beisei chi a nih rih lo," a ti a, demonstration farm ang chauh a nih thu a sawi.
DFDO sawi danin chakai hian nisa ni lo, temperature pawh 25°C - 30°C velah an mamawh a, heivang hian luiluang ni loah khawi theih a ni em tih hre turin enchhinna hi kalpui chhoh mek a ni.
Fisheries department hotute chuan, chakai farm-ah hian hlawhtlinna hmuh tur a la awm loh thu Vanglaini zawhna chhanga sawiin, "Hlawhtlinna a awm dawn nge dawn lo kan hre bik lo. Tun dinhmunah chuan hmun danga kalpui tumna a awm rih lo," an ti a; Dumluiah hian a hlawhtlin chuan ngaihtuahna thar siam theih a nih tur thu
an sawi.