Hripui vei enkawl mek percentage-ah India ramah Mizoram a sang ber

India rama state leh union territory 36 zingah Mizoram chu Covid-19 hri vei hmuh chhuah tawh aṭanga enkawl mek (active case percentage) sanna ber niin 6.01% a tling a; hripui vei hmuh tawh aṭanga tehin thihpui tawh zatah erawh a hniam ber dawttu a ni thung.

Nimin tlai dar 5 thlenga sorkar laipuiin India ram Covid-19 dinhmun a tarlanah active case percentage 2% aia sang state pahnih chiah a awm a, Mizoram (6.01%) leh Kerala (2.51%) a ni. State/UT zingah active case 1% kai 13 leh 1% aia hniam 21 a awm mek a, a hniamna ber chu Bihar state niin 0.15% a ni.

Hmarchhak state zingah Tripura chu active case percentage hniamna ber niin 0.16% a ni a; Assam-ah 0.53%, Meghalaya-ah 0.81%, Arunachal Pradesh-ah 0.98%, Sikkim-ah 1.06%, Nagaland-ah 1.32% leh Manipur-ah 1.67% a ni.

Hripui vei hmuh tawh aṭanga thihpui tawh zat percentage hniamna ber chu Dadra And Nagar Haveli And Daman And Diu niin 0.03% a ni a, Mizoramin dawtin 0.32% a ni.