Valentines Day Blood Donation Camp-ah mi 931-in thisen an pe

Association for Voluntary Blood Donation (AVBD), MSACS leh blood bank hrang hrangte chuan nimin khan Valentines Day pualin Blood Donation Camp an huaihawt a, Mizoram pumah mi 931-in thisen an pe.

Valentines Day Blood Donation Camp hmanna pui ber Model Blood Bank, Civil Hospital, Aizawlah chuan chawhma dar 11-ah a hawnna hun hman a ni a, Civil Hospital medical superintendent Dr Lalhmuchhuaka’n a hawng.

Dr Lalhmuchhuaka chuan, thisen chu a tlukpui mithiamte’n an la siam chhuah theih loh, mihringin a pek theihte zinga hlu bik a nih thu sawiin, “Thisen pek hi thil hlu danglam tak, kan hmelmate leh kan mil vak loh zawngte pawh ni se, an chunga hmangaihna kan lantir theihna remchang tak a ni,” a ti a; thisen petute zawng zawng chungah lawmthu sawiin, thisen pe chhunzawm zel turin a sáwm.

Valentines Day Blood Donation Camp hi Aizawl Civil Hospital, Synod Hospital, ZMC leh Christian Hospital bakah, district hospital hrang hrang blood bank-ahte buatsaih a ni a, thisen unit 931 pek a ni.

Hawnna inkhawm kaihruaitu AVBD information secretary K Zothanpara tarlan danin, Valentine's Day puala thisen pek rûnpui hi kum 2010 khan Civil Hospital, Aizawlah ṭan a ni a, kum tin buatsaih zui a ni.

AVBD chuan, Valentine's Day chu ṭhalaite'n hehêu nan leh khawi khawi emawa interek hranna atan ringawt hmang liam lo a, thil ṭha tih nan, mite tana malsawmna an nih theihna remchang atan leh hmangaihna lantirna ṭha tak nia an hriat avangin kum tin thisen pek runpui an huaihawt chho ta tih an tarlang.