KHAWTHLIR

Larsapin kawm

Governor Dr Hari Babu Kambhampati chuan nimin khan Raj Bhavan-ah Doordarshan leh All India Radio hotute a kawm a; an kalphung leh sorkar laipui scheme puanzar chungchangte an sawiho.

Intihsiakna buatsaih

Election Commission of India (ECI) chuan National Voters' Day, 2022 denchhenin National Voter Awareness Contest - 'My Vote is my Future - Power of One Vote' tih thupui hmangin intihsiakna a buatsaih a; January 25, 2022 aṭanga March 15, 2022 thleng a awh ang. Intihsiakah hian quiz, slogan, zai, video siam leh poster design te a awm a, March 15, 2022 hmain Voter-contest@eci.gov.in ah hming, address leh phone number bakah thil thehluh tur chanchin tawite ziak theh luh tur a ni.

Tanpuina pe

Aizawl West III bialtu MLA VL Zaithanzama chuan nimin khan Khatla Local Council House-ah a bial chhunga veng hrang hranga LLTF hruaitute kawmin, Covid-19 avanga an veng chhunga harsatna tawkte ṭanpuina atan pawisa a pe. VL Zaithanzama chuan hripuiin eng angin nge harsatna a thlen zel dawn hriat a ni lo tih sawiin, "Veng mipuite'n harsatna an tawh dan ka hriat zung zung a, chak taka hma kan lak ho zel a ngai a ni," a ti.

Meth man

Excise & Narcotics department (END) chuan February 13, Pathianni tlai khan Ruantlang (Champhai district) ngaw karah methamphetamine kg. 10.256 leh a neitua puh Lalthanzauva (27) s/o Lalsawiṭhuama leh Rualthankhuma (28) s/o Ngunneihkapa, Khawmawi, Myanmar nia inchhal ve ve an man. Pathianni vek khan END hian Ṭhuampui Veng, Aizawlah ganja kg.33 leh a neitua puh Lalruattluanga (52), Ṭhuampui Veng an man bawk.

DC-in khap

Serchhip DC chuan nimin khan thupek a chhuah a, dan loa silai kawl an awm thu leh silai, sairawkherh hmanga sava leh ramsa veh an awm ṭhin thu tarlangin, "Hengte hi khap a ni," a ti. Thupek zawm lote chu IPC section 188 hmanga hrem tur an ni.