MPYCC-in kawlphetha man tihsan tum An pawm loh thu JERC-ah an thlen

Mizoram Pradesh Youth Congress Committee (MPYCC) chuan nimin khan Mizoram sorkarin kawlphetha man tihsan a tum an pawm loh thu Joint Electricity Regulatory Commission (JERC), Mizoram & Manipur hnenah ziakin an thlen.

MPYCC chuan JERC hnenah hian April, 2021 khan Mizoram sorkar chuan kawlphetha chhit man 41.92% laiin tihsan a rawt tih tarlangin, "An rawtna a san em avangin 20.68% in tihpun a ni. Kum khat em pawh a vei hmain eng chhit man tihpun rawtna lo awm lehin, a hmaa kan duh loh leh pawm harsa kan tih ang thoa kawlphetha hman man uchuak taka tihpun rawt a ni leh ta mai hi hriatthiam harsa kan ti hle," an ti.

Vanglaini chanchinbu kaltlanga kawlphetha chhit man 20.05% a tihsan rawtna, February 20, 2022 thlenga tihsan duh lohna thehluh theih a nih chungchang tarlan a nih thu tarlangin MPYCC chuan, "Kawlphetha chhit man tihsan rawtna hi kan ram dinhmun kan ngaihtuahin kan pawm thei lo," a ti a, JERC chu sorkar rawtna pawm lo turin an ngen.

MPYCC president Dr Lalmalsawma chuan Covid-19 avanga harsatna an tawh laia uchuak taka eng chhit man tihsan a tum chu mipuiin an tlin tawh rih lo nia sawiin, "Ṭul loa sum khawhralna lam ti tlem zawk turin kan chah duh. Congress sorkarin 'loss making board' a tih tawp takte MNF sorkar hian, a duhsak zawngte nihna ṭhi behtir nan a tharthawh lehte hi, hriatthiam harsa kan ti a ni," a ti.

MNF party mi leh sate pawh kawlphetha chhit man sang dodal tura sawmin Dr Lalmalsawma chuan, "Kum 2015-a MNF party-in eng chhit man a pung tia an duh lohna lantira kawng an zawhte kha mitthlaah a la cham. Khatih laia ṭhahnem ngai taka kawng zawhtu MNF party member-te pawh kha mipui thlavang hauh nan electric hman man tihsan tumna hi nasa taka rawn dodal turin kan sawm," a ti bawk.