Minister hoin kal zel dan tur sawiho

Rural Development (RD) minister Lalruatkima chuan nimin khan a pisaah official-te District Rural Development Agency (DRDA), District Rural Development Office (DRDO) leh DRDA scheme tawp dawn avanga kal zel dan tur a sawipui. Meeting-ah DRDO atana post ṭul zual 22 siam nan RD department hnuaia sanctioned post hrang hrang 22 pekkir (surrender) tum a nih thu tarlan a ni.

Lalruatkima chuan sorkar laipuiin hun rei tak aṭanga DRDA Scheme a kalpui tawh chu ram pumah tihtawp an tum avangin DRDA-in hna an thawhte chhunzawm zel a nih thei nan district-ah te RD pisa (DRDO) a awm a ngai tih a sawi a, “DRDA hi tawp mah se, hengte hi DRDO-ah letin la kalpui zel chu ṭha nia department-in a hriat avangin he ruahmanna hi siam a ni,” a ti.

Panchayati Raj zawm state-ah te chuan Zilla Parishad-te’n DRDA hna an la tura beisei a nih thu sawiin RD Minister chuan,”Mah se, hmarchhak state tam zawkin Panchayati Raj kan zawm lo a, Zilla Parishad ang te hi kan nei lo. Chuvangin DRDA aiah DRDO hi kan mamawh takzet a ni,” a ti a, district-a RD Scheme hrang hrang kaikhawmtu an awm loh chuan hmasawnna hna hrang hrang thawh a harsa thei nia a hriat thu a sawi.

He hunah hian post siamrem ngai zat te, sorkar sumbawm a nghawng dan tur te, DRDO pawimawhna leh an mawhphurhna te an sawiho a; DRDO atana post ṭul zual 22 siam nan RD department hnuaia sanctioned post hrang hrang 22 pekkir (surrender) tum a ni.

Nikum khan DRDA a post 84 chu Mizoram sorkar hnuaiah dah ngheh (absorbed) a ni a, district pariatah DRDA inrelbawlna chu project director hnuaiah awmin office hmun hma bakah quarters pawh an nei vek tawh. District thar pathumah erawh DRDA hmunhma tur hi buatsiah mek niin Additional DC-te’n project director hna an kawp a ni.

Sorkar laipui chuan, Centrally Sponsored Scheme – DRDA Administration Scheme hi April 1, 2022 aṭangin tihtawp a nih tur thu an rawn hriattir a, Zilla Parishad awmna state-ah chuan DRDA hi he body-a chhunfin a rawt. Zilla Parishad awm lohna state-ah te chuan state sorkarin a duh angin ruahmanna siam mai se, a ti bawk.

Ṭhutkhawmah hian RD secretary Vanlalngaihsaka, DPAR secretary K Lalthawmmawia bakah Finance leh RD department hotute an tel.