RBI-in Financial Literacy Week an hmang

Reserve Bank of India (RBI) chuan nimin khan Dawrpuia RBI conference hall-ah sum enkawl leh hman dan inzirtirna hapta 'Financial Literacy Week (FLW)' hawnna hun an buatsaih a; hapta thupui atan 'Digital hmang hian, Himna pan rawh' (Go Digital Go Secure) tih hman a ni.

Hapta hawnna inkhawm hi RBI Aizawl general manager P Shimrah-in kaihruaiin, internet kaltlangin Finance commissioner Vanlal Chhuanga chuan thu a sawi a, hmarchhak state-ah digital hmanga sum chettir chungchangah hmasawnna a muan thu sawiin, "A bik takin Mizoramah pawh kan hmelhriatna ala rei lo a, hma erawh kan sawn ve zel. Tun hmaa bank-a kala hlawh lak leh thildang kan tih ṭhin pawh tunah chuan digital payment hmangin thil engmawzat kan kalpui ve tawh," a ti a, digital payment hmangtu mipuite himna ngaih pawimawh a ṭul thu a sawi.

Vanlal Chhuanga chuan, RBI in FLW a buatsaih chu a lawm thu sawiin, "Mizoram sorkarin electric bill leh bill ṭhenkhat peknate chu online (mobile appilication) hmangin a kalpui tawh a, tunah hian online hmanga bus ticket book-na a ruahman leh mek," a ti a, FWL chu mipuiin an hlawkpui ngei a beisei thu a sawi.

He hunah hian IFSL director Jennifer HL Duhawmi, NABARD officer-in-charge L Leivang, SLBC Convener Bank regional manager LP Lalchangkima leh Mizoram Rural Bank general manager Ramdinsangate'n FLW chungchanga leh an hmalaknate an sawi.

Financial Literacy Week hi February 18, 2022 thleng neih tur a ni a; RBI hotute sawi danin, kumin FLW hian thu ken - digital hmanga indawr remchanna, digital hmanga indawr himna leh digital hmnga dawrtute venhimna tihte a nei. Digital payment chungchang hrechiang duh tan www.rbi.org.in ah en theih a ni.