Mizoramah ni 23 chhung a zawnin Positivity rate 20% chung lam ni tawh

February 13, Pathianni khan Mizoramah Covid-19 vei 577 hmuh chhuah a ni a, positivity rate chu 32.52% niin January 22, 2022 aṭang khan ni tin a zawnin ni 23 chhung swab sample endik aṭanga hripui vei hmuh chhuahin 20% ala tling vek.

Nimin khan tlai dar 5 thlengin hripui vei dam tawh mi 1,988 chhuahtir an ni a, mitthi an awm lo. Pathiannia Covid-19 vei hmuh chhuahte chu RAT hmanga hmuh 559, True NAT hmanga hmuh pariat leh FIA hmanga hmuh 10 an ni a, positivity rate chu 32.52% a tling. Mi 577-te chu mipa 265 leh hmeichhia 312 an ni a; Pathianni khan ZMC leh Lungleia RT-PCR hmangin swab sample endik a ni lo.

February 13 khan Mamit leh Khawzawl district tih lo district dang zawngah sample endik a ni a, sample endikna district pakua zinga district pariat chu positivity rate 10% chung lam niin 50% chunglam district pali a awm bawk. Positivity rate sànna ber Lawngtlai district-ah 77.35% a tling a, Kolasib district-ah 2.32% niin a hniam ber.

Nimin tlai dar 5 thleng khan hripui vei dam tawh mi 1,988 chhuahtir an ni a; IDSP record angin, Mizoramah Covid-19 vei 1,96,997 hmuh chhuah a ni tawh a, mipa 92,487 leh hmeichhia 1,04,510 an ni a, mipa aiin hmeichhia 12,023-in an tam zawk. Nimin tlai dar 5 thleng khan mi 1,86,504 (43.91%) chhuahtir an ni tawh a, mi 637 (0.32%) thi tawhin, enkawl mek mi 9,856 (5%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 1,96,997 chu mi 1,000 zelah hripui vei mi 179 an awm ang a ni a; mi 1,00,000 zela Covid-19 vangin mi 58 an thi tawh ang a ni tih sorkar thuchhuakin a tarlang.