Meth man danah thil fel lo awmah ngai

February 11, 2022-a North Chhimluanga kudam bula BSF leh Excise & Narcotics department (END) ten methamphetamine (meth) kg. 12.800 an man chungchanga thil fel lo awma an hriat avangin Kolasib District MJA president Andrew VL Auva leh MJA member Zomuanpuia Tlau chuan Kolasib DC Dr H Lalthlangliana hnenah chhui chiang tura ngenna an thlen.

MJA member-te’n DC hnena an thlen danin, kudam hmunah hian BSF thleng hmasa an lo awm a, heng BSF-te hi Durtlang leh Sakawrtuichhun Unit BSF ruihhlo chungchanga information dawngtute’n Assam lama an phurh tlang loh nana phungbawm a an sawm Assam lam BSF-te an ni. Anni hian N Chhimluanga Shamir Deb kudam nia an sawi chu an lo thleng hmasa a, BSF thleng hmasate an hmuh hian car pakhat chu kudam kawt aṭang hian a tlan chhuak thut a, car aṭang hian meth bag khat a tla a ni.

Car-ah hian hnamdang pathum an chuang a, Vairengte lam a pan niin kudam bula awmte chuan an sawi. Mah se, ruihhlo phurtu ni ngeia hriat lirthei hi tumah in an umzui lo a, Vairengte Police leh Excise & Narcotics duty pawh lirthei lo dang a, lo man turin hriattir an ni lo. BSF-te’n an sawm END-te chuan kudam bula awm meth bag khat chu an man ta ringawt a ni.

Kolasib DC chuan BSF DIG hnena lehkha a thawn tur thu MJA member-te hi a hrilh.