Doctor, nurse leh health worker Naménloin an indaih lo mek - Health Minister

Health & Family Welfare minister Dr R Lalthangliana chuan, tun dinhmunah hriselna lama thawktu - doctor, nurse leh health worker-te Mizoramah naménloa an indaih loh mek thu a sawi.

MJA member-te tana Civil Hospital, Aizawl (CHA)-in free health check-up an buatsaih kharna inkhawm, nimina CHA-a buatsaih a hmanpuinaah thu sawiin Health Minister chuan, "Doctor, nurse leh health worker-te naménloin an indaih lo. Nurse-ah post ruak 200 chuang leh health worker-ah post ruak 300 chuang a awm. Lak zung zung theih a ni rih si lo," a ti.

Dr R Lalthangliana chuan, National Health Mission (NHM) hnuaiah Rs 50,000 hlawha lâk tur doctor an hmuh zawh loh thu sawiin, "NHM hnuaiah hian rawih tur an awm lo a, kan buai khawp mai. Thawk mek bàn tumte pawh thawk rih hram hram turin kan ngen," a ti a, doctor 10 vel kuminah an pension dawn thu leh parukin post graduate an tih mek thu a sawi.

Zoram Medical College (ZMC)-a zir mekte chhuah hlan a nghahhlelhawm thu sawiin Minister chuan, "Kum tin mi 100 zel admit an ni a, kum 2024-ah chuan an chhawr theih tawhin a rinawm. Engtik níah emaw chuan kan indaih theih ngei a rinawm. Tunah chuan indaih lo chung chungin Covid-19 karah kan kal nâw nâw a ni," a ti.

HFW Minister chuan, CHA-in hma a sawn zel thu sawiin, "Kan sorkar hmain ICU panga chauh a awm ṭhin a, kan indaih lo hle. Kan sorkar hnuah khum 10 kan dah belh a, cheng nuai 100 tél sèn a ngai. ICU kan dah tharna hnuaiah hian khum 10 dah belh ngei ngei ṭul ka ti khawp mai," a ti a; NICU, PICU, adt. nen CHA-a ICU-ah khum 21 a awm mek thu a sawi.

Dr R Lalthangliana chuan, CHA-a Cardiology department chu cheng vbc. 10 vel séngin tihchangtlun tum a nih thu a sawi a, "MRI pawh kan neih ngei theihna atan theihtawp chhuah a ni. NITI Aayog member Dr Vinod Paul chu hma min lâkpui turin ka ngen a, Boeing company aṭangin min ngaihtuahsak thei ngei dawnin a lang. MRI kan dawn tur chu cheng vbc. 600-700 man vel a ni," a ti.

MJA health check-up khàrna inkhawm hi CHA medical superintendent Dr Lalhmuchhuaka'n a kaihruai a; MJA president Zonunsanga Khiangte pawhin thu sawiin, "Hri léng kaihhnawih vanga member eng emaw zatin an chhawr ṭangkai thei lo chunga hri léng kara health check-up hlawtling tak buatsaihsak kan ni hi a lawmawm hle," a ti a; Health minister Dr R Lalthangliana'n MJA-te tan duhsakna a lantir ṭhin chu an lawm thu a sawi.

MJA free health check up-ah hian MJA member 50 vel chu CHA-a thawkte'n kawng hrang hrangin an hriselna dinhmun an endiksak a ni.