Sorkarin PPE ṭhui man Cheng nuai 168 a la bá

Mizoram sorkarin September 2021 vel aṭanga tualchhunga puan­ṭhuitute hnena personal protective equipment (PPE) a ṭhuitirna, hmarua leina leh a kaihhnawihah cheng nuai 168 a la bá. PPE ṭhuitute chuan nimin khan Commerce & Industries minister Dr R Lalthangliana, Health minister ni bawk chu a pisaah hmuin, PPE ṭhui man pe thuai turin an ngen.

PPE ṭhuitute chuan zawhna chhangin, minister R Lalthangliana chuan an hlawh tur chu Treasury lamah a la awm thu a lo hrilh tih an sawi a, "Vawiinah chuan pensioner ho pawisa an buaipui avangin naktuk lamah Treasury aṭangin in hlawh tur pek chhuah a ni ang, tiin min hrilh," an ti.

Sorkarin PPE indaih lohna avangin hman­hmawh takin PPE a ṭhuitir thu leh hahchawlhna hun nei mang loa an ṭhui ṭhin thu sawiin PPE ṭhuitute chuan, "Kan hriselna pawhin a tuar a, tlaivar leh chaw ei mumal hman loa ṭhui pawh kan ngah. Nikum khan December 17, 2021-ah hlawh in la hman ang min ti a, mahse, tun thlengin min la pe lo," an ti a; sorkarin a tihkâwi dan chu lungawithlak loh an tih thu an sawi.

Tarlan tawh angin, Mizo­ram sorkar chuan September 2021 khan a báin Aizawl veng hrang hranga puan ṭhui thiamte chu PPE 14,000 a ṭhuitir a, PPE indaih lohna a nasat avangin tualchhunga industry pahnih chu PPE 14,000 dang a ṭhuitir bawk.

Puanṭhuite leh industry pahnih hnena PPE ṭhuitirna, hmanraw leina leh a kaihhnawih danga senso cheng nuai 168 vel chu nimin thleng khan Mizoram sorkarin a la pe lo a ni.